Sawrkar thawhpui that duh loh vanga VC Term pawhtawi mai theih thu sawi in VC te a barakhaih

All Mizoram VC Association (AMVCA) chuan VC ten Sawrkar an thawhpui that duhloh vanga VC Term pawhtawi a nih mai theih thu sawi a ni chuan a barakhaih takzet tih an sawi.

Nimin-a thuchhuah an siam ah All Mizoram VC Association (AMVCA) chuan June 10, 2024-a Southern Headquarters ZPM Lunglei Chhung Inkhawm-a Health Minister thusawi Media lama an lo hmuh-ah VC ten Sawrkar an thawhpui that duhloh vanga VC Term pawh pawhtawi a nih mai theih thu lo lang tel chuan AMVCA te a barakhaih takzet tih an tarlang a. VC te chu India ram Democracy lungphum pawimawh tak pathum (3) Central, State leh Local Goverment zinga pakhat, ‘Democracy Grassroot’ an lo tih hial, tualchhung Sawrkar, ‘The Lushai Hills District (Village Council) Act.1953’ hmanga rorel tura mipui ten kum 5 atana an thlanchhuah te an ni tih sawiin, “He danin thuneihna min pekte leh Central leh State Sawrkarin Programme & Policy hrang hranga Agency atana min hmanna kawnga tha taka thawh hi kan Duty, VC atana thlan kan nih chhan a ni,” an ti.

An duty tihhlawhtlinna kawngah mahni hna pawh thawk hman lek lo a khawtlang leh ram tana an buai ve em em laia hetiang thu an hre ta mai chu mak an tih thu pawh ALMVCA chuan an thuchhuah ah hian tarlangin, “Kan Health Minister in Sawrkar thawhpui duhlo VC a tihte hi khawi VC nge ni a, eng kawngin nge an lo thawhpui duh loh tih hi min hrih turin kan ngen a. AMVCA anga lo in zilh a, tha taka Sawrkar thawhpui tura lo infuih thar leh hi kan inpeih reng a ni tih hi min lo hriat sak se kan duh hle mai,” an ti bawk. 

Hei bakah hian AMVCA chuan Village Council (VC) te Term chu Central sawrkar in Panchayati Raj System a siam zulzuiin kum 5 term tura tih a nih thu pawh an thuchhuah ah hian tarlangin, “State Sawrkar hian a duh chuan a pawt tawiin a pawtsei thei ngei mai, mahse, chhan tha tak neia tih tur ni ah kan ngai,” an ti a. “Village Council din tirh ata Covid-19 vanga thla 5 chhung MNF Ministry in a pawhsei bak kha VC Term kal lai tih danglam hi Sawrkar kal tawh ten an la tih ngai loh niin kan hria. Chhan bulbal sawi tur tak hre silo a, ‘VC ten min thawhpui tha duhlo’ tih chhuanlam mai maia mipui ten duh taka an thlan ve tho VC te term pawhtawi sak tum niawm taka ngaihtheih thu lo lang ta hi a thalo kan ti hle a, Village Council zahawmna tihbawrhbanna leh Democracy pawngsualna ah kan ngai tlat a ni,” an ti a. “Sawrkar in min thawhpui a duh phawt chuan kan inhawng em em zawk a ni tih hi All Mizoram VC Association angin kan han puang duh a ni e,” an tin bawk.