International Day of Yoga hmang turin inbuatsaih mek

Kumin hian International Day of Yoga (IDY) chu June 21, 2024 khian hman leh a ni dawn a, hemi atan hian inbuatsaihna kalpui mek a ni.

Kum 2014 December thla khan United Nations (UN) General Assembly chuan June ni 21 chu ‘International Day of Yoga’ atan a puang a, he ni hi khawvel pumah urhsun taka hman thin niin Sawrkar laipui hnuaia Ministry hrang hrangten Yoga chungchang inhrilhhriatna te neiin, ruahmanna hrang hrang an siam thin a ni. Kumin-a International Day of Yoga-ah hian thupui atan ‘Yoga for Self and Society’ tih chu thlan a ni a, Ayush Programme Officer Dr. Shirley Lalbiakzuali Chhangte mihringte nitin mamawh taksa hriselna, rilru hriselna thlen theitu chu Yoga a ni tih sawiin, Yoga in Sakhaw tihbik a neih loh thu leh nunphung zirna a ni, a ti a. Yoga chu mihring theihna phochhuaktu leh tanpuitu a ni tih sawiin, mahni leh midang te thatna thlentu atan a pawimawh thu leh Mizote’n Yoga an lo hmelhriat dan a Sakhaw ang chi dah bo a taksa sawizawina atana a pawimwhna te hriat a tul thu a sawi a. Natna chi hrang hrang enkawlna atana Yoga chu hman tangkaina tur a tam thu leh chutiang enkawlna atana a pawimawh em em thu a sawi bawk.

Tun dinhmunah Ayush hnuaiah hian Instructor 12 an awm mek a, heng Instructor te hi  District Hospital leh Integrated Ayush Hospital, Thenzawl-ah te rawn theihin an awm mek a. Yoga Instructor awmlohna hmunah pawh Ayush Doctor te Yoga exercise chungchangah rawn theihin an awm mek a. Administrative Training Institute (ATI) leh Ayush Dept tangkawpin trainees chi hrang hrangte hnenah Instructor pakhat kaih-hruaina in ‘Yoga Exercise’ kalpui mek a ni bawk.

Kumin-a International Day of Yoga (IDY) hi khawvel hmun dangte rualin tunkar Zirtawpni, June 21, 2024 khian Mizoram-ah pawh hman a ni anga, a lawmna pui ber chu Aizawl Republic Vengthlang-a Hawla Indoor Stadium-ah hman a ni ang.