Speaker in Aizawl bawlhhlawh paihna a tlawh

Mizoram Legislative Assembly Speaker Lalbiakzama chuan niminpiah khan Aizawl khawpui bawlhhlawh paihna hmun, Solid Waste Management Center, Tuirial tlawhin tihchangtlunna tura hmalak dan tur kawng AMC hotute a sawipui.

Assembly Speaker Lalbiakzama hi Municipal Commissioner Er. Lalhriatpuia; Executive Engineer Er. Lalmuanpuia leh Deputy Municipal Commissioner K. Vanlalruata ten an tawiawm a, AMC hotute hian bawlhhlawh tawihthei leh tawihthei lo a hranga paih a, mumal leh awmze nei taka sawngbawl a nih dan te, bawlhhlawh tawihthei chu a vaiin sawngbawl a nih thu leh bawlhhlawh tawihthei atanga leitha siamchhuah hna chu tha taka kalpui a nih dan te Speaker hi an lo kawhhmuh a. Khawl hmanga chak zawka hna thawh theih dan turte an lo sawipui bawk a ni.

Heng bakah hian SWMC Tuirial tihchangtlun nana AMC-in ruahmanna a siam dan te sawiho in Speaker hian Aizawl khawpui bawlhhlawh sawngbawl kawnga theihtawpa AMC puih a tum thu leh mamawh an neihte pawh a hnenah thlen ngam turin AMC hotute hi a chah a ni.