Sawrkar thar in Cooperative Movement a ngai pawimawh dawn - Cooperation Minister

Cooperation Department changtu Minister PC. Vanlalruata chuan Sawrkar tharin Cooperative Movement a ngai pawimawh dawn tih a sawi.

Mizoram State Cooperative Marketing and Consumers Federation Ltd. (MIZOFED) Annual General Assembly vawi 26-na nimin-a Synod Conference Centre, Aizawl-a neih a hmanpuina ah Cooperation Minister PC. Vanlalruata chuan Cooperative Movement ngaih pawimawh a nih tur thu sawiin, Sawrkar tharah chuan a thlawna thil dawn beiseina chu tha an tih loh avangin kuthnathawhtute leh sawrkar atanga puihna dawngtu turte pawh 'partner' tih hminga thlak a nih tur thu te a sawi a. Mizoram-ah Cooperative Movement hi tha leh chak taka kalpui theih chu nise ram siamthat leh hmasawn nan hmun pawimawh tak a luah thei tih sawiin, Sawrkar laipui pawhin Cooperative Movement chu ngai pawimawh in kum 2019 atang khan Ministry of Agriculture hnuai atangin lachhuakin Ministry hran angin a din tawh a, ramchhung state tam takah chuan miretheite khaichhuah nan leh eizawnna atan Society-te chu hman mek a nih thu a sawi bawk.

Minister chuan India hmarchhak State pahniha National Cooperative Development Corporation (NCDC) Office hawn thar zingah Mizoram pawh a tel thu sawiin, Mizoram State-ah pawh Society-te tihchangtlung a nih deuh deuh theih nan tanruala tihtakzetna nen thawhho a tul thu a sawi a. Khawvel pumah Cooperative Society hrang hrang hmanga eizawng chu mihring maktaduai 280 vel an tlin tawh thu leh Mizoram-ah pawh ngaih pawimawh a hlawh deuh deuh thu sawiin, thalai tam takte tana eizawnna tlaka siam chhoh chu sawrkar thil tum a nih thu a sawi a, Ministry of Cooperation-ah Mizoram tan project thehluh tum a nih thu a sawi bawk.

He hun hi Aizawl West-III bialtu MLA VL. Zaithanzama chuan Khual Zahawm nia hmanpuiin Cooperative Movement chu sawrkar atanga tanpuina beisei lova mahni leh mahni intanpui thei tur an nih laiin Mizoram-ah chuan rin aiin a hlawhtling em em lo tih a sawi a. Tunhnaiah MIZOFED in Essential Commodities-a a sumdawnna ah hma a sawn chu a lawmawm hle tih sawiin, Society hi Company a nih loh avangin Cooperative principle kengkawh chungin thawk zel turin a chah bawk.

Mizorama Cooperative Society-te dinhmun leh kum kaltaa MIZOFED hnuaia hlawhtlinna hrang hrangte he hunah hian tarlan niin MIZOFED Annual Report tarlan danin tun dinhmunah thawktu 171 neiin sumdawnna hlawm lian pathum (3) kalpui mek a ni a, chung atanga kum kalta 2023-24 chhungin MIZOFED-in hlawkna (net profit) a hmuh zat chu Rs. 1,68,21,485.07/- a ni.