Combined Civil Services Foundation Training tan

Combined Civil Services 2023 Batch te tana Foundation Training chu nimin khan Aizawl-a ATI-ah neih tan niin DP&AR Minister K. Sapdanga chuan a hawng a ni.

He Training hawnna hunah hian DP&AR Minister chuan Officer thar te chu Mizoram sawrkar tinghettu, sawrkar innghahna leh a thir ruhrel an ni tih sawiin, Service Association hotute atanga fuihna thu an dawn te zawm theih tura chahin, Officer thar te chu an hnathawh te an rawngbawlna angah ngai turin a fuih a. Transfer and posting chungchang sawiin, sawrkarin Officer te chu hman tangkaina turah a transfer thei an tih a sawi a. Transfer sutlet tura insawipui chu sim a that thu pawh sawiin, “Sawrkar hotuten transfer & posting a siam reng reng chu a tha ber tur ruahmanna nena a siam thin a nih avangin thuawih taka kan zawm tlan a tha ber ang,” a ti bawk.

Tun tumah hian MCS 10, MIS 5 leh MF&AS 12 ten Foundation Training hi an nei dawn a, a vawikhatna atan Trainee te hi ATI Hostel-ah an training chhung an awm nghal dawn a ni.