Criminal Law thar hmang turin Mizoram inbuatsaih

Mizoram IGP Lalbiakthanga Khiangte chuan ramchhunga hman tur hnuchhuina atana dan zam tharn Criminal Law pathum (3) te chu Mizoram a hman a nih vat theihna’n theihtawp an chhuah thu a sawi.

IGP Lalbiakthanga Khiangte chuan sawrkar laipui in Criminal Law a duan thar pathum te chu July ni 1 atanga Mizoram Police ten an hman ve theihnan nasa taka an inbuatsaih thu a sawi a, Mizoram Police-te training pe turin NCRB atanga Trainer an chah chhuah thu leh District hrang hranga Police Officer-te chu training an lo pek lawk tawh thu bakah training pe thei tur mi 100 chuang an neih tawh thu a sawi a, Mizoram Police za zela 80 te chu Criminal Law duan thar chungchangah training an in pek tawh thu a sawi bawk a ni.

Heng dan thar hnuaiah hian Criminal Crime Tracking Network System leh Prosecution, Court leh Prison bakah Police ten case thlenchin an hriat zung zunga an inthlunzawm theihna atan Inter Operable Criminal Justice System buatsaih a nih thu a sawi a, hengte hi Mizoram Police Station zawng zawngah vuah vek a nih tawh thu sawiin, pawikawihna lian thlenna hmun pawh Video hmanga chhinchhiah vek a ngaih tawh thu a sawi a, hemi atan hian videographer ni turin Mizoram Police mi leh sa 257 te chu zirtirna pek an nih tawh thu a sawi bawk.

IGP chuan dan thar hnuaiah FIR pawh Online hmanga thawn leh dawn theih a nih tawh tur thu sawiin, Online a Case register thei tur Mizo-ram District 11 atangin Police 148-te zirtirna an pek tawh thu a sawi a. Police ten Forensic Evidence an lak thiamna hun atan Sawrkar laipuiin India ram State tin a Police-te kum nga chhung hun a pek thu sawiin, Mobile Forensic Vehicle pawh Mizoram District tina dah an tum thu leh tunah hian District 4-ah a awm tawh thu a sawi bawk.