Mizoram Sports Conclave 2024 neih tur thlirho

Tun thla ni 13 leh 14-a Mizoram Sports Conclave neih tur atan Mizoram States Sports Council (MSSC) chuan nimin khan Sports Association hruaitu thenkhat a kokhawm.

Nimin-a he thtukhawm ah hian Mizoram States Sports Council Secretary John Tanpuia chuan, India ramin kum 2036-a Olympic Games a thlen tumah Mizo thalai tam zawk an tel theihna tur atana inbuatsaihna turin Mizoram Sports Conclave 2024 buatsaih a ni dawn tih sawiin, he Conclave-ah hian India ram chhunga Sports lama sulhnu lo nei tawhte chu sawm an nih thu leh Sawrkar laipui atang mai bakah State thenawm atangin Minister te leh Sports lama sawrkar hotulu te sawm an nih thu a sawi a. India ramchhunga Infiamna lama sum seng tam company- Tata Trust, Inspire Institute of Sports, Tata Steel Ltd. leh Reliance Foundation Sports te chu sawm niin ram chhunga chanchinbu lian Times of India, Indian Express leh Sportstar Editor te lo kal tura sawm an ni a, an ni hi Pannel-ah an thu dawn a, Sports lama hmasawna tur hrang hrang zawh theih a nih thu MSSC Secretary chuan a sawi bawk.

Mizoram Sports Conclave, 2024 hi June 13 leh 14 khian Baptist Centre, Falkland-ah neih tur a ni a, Mizoram State Sports Council hnuaia Sports Association hrang hrang 33 zingah Mizoram Boxing Association, Mizoram Weightlifting Association, Mizoram Wrestling Association, Hockey Mizoram, Mizoram Table Tennis Association, Mizoram Amateur Taekwondo Association te chu ngaih pawimawh hmasak an ni.