David Sailo ni ngeia hriat Judicial Custody-ah dah

Lok Sabha MP thlanna neih dawna ZPM Candidate Richard Vanlalhmangaiha'n thubuai a thehlut Mizoram Police ten an chhuina kal zelah David Sailo ni ngeia hriat R. Lalchhuanmawia, Galili Veng, Zemabawk chu manin Judicial custody-ah dah a ni.

Richard Vanlalhmangaiha hian a chanchin an ziah danah mi pathum, David Sailo tia hriat, Tuesday Nightmare tia hriat leh Tlanghmingthanga, Mission Vengthlang te lakah hian Defamation case hi a file a, Cyber Crime Police te chuan Tuesday Nightmare leh Tlang-hmingthanga te chuan tha takin an thawhpui tih an sawi a, David Sailo hi an hriat lawk theih loh avangin case hian hun a duh tih an sawi a. Mizoram Police Cyber Crime te chuan he case hi Non-Cognizable case anih avangin thu zawhfiah tura koh bak tih theih an neih loh thu sawiin, mahse, Court chuan Cognizable case-ah letin an chhui ta tih an sawi a. Rinhleh hrang hrang an neih te sawr zim zelin a tawpah R. Lalchhuanmawia hi man a nih thu an sawi a ni.

Mizoram Police te chuan Facebook te nen an tanho hnuah David Sailo Account leh phone number inthlunzawm te chu R. Lalchhuanmawia phone ngei a ni tih an chhui chhuak tih sawiin, ani hian a pha thung tih an sawi a. May 31, 2024 khan R. Lalchhuanmawia hi Police te hian an la a, zan khat an kawl hnuah June 1 khan chhuah leh a ni a, June 4-ah an man leh a, an man hmasak leh an man nawn inkarah hian David Sailo account hi tum tam tak tihchhiat tum anih thu an sawi a. David Sailo account nen inzawm phone number hi an dial pawhin R. Lalchhuanmawia phone ngei-ah hian a ri chhuak tih an sawi bawk.

Tuirial RMSA High School-a Headmaster (Non-functional) R. Lalchhuanmawia hi thubuai nei lai anih avangin a hna atanga suspend na order pawh tihchhuah nghal a ni.