Mizoram leh Assam Power Minister an inkawm

Power & Electricity Minister F. Rodingliana leh Assam Power Minister Nandita Garlosa-i te chu niminpiah khan inkawmin Power Sector lama Mizoram leh Assam bakah North East States dangte intelkhawma, thawhhona tha zawk neih dan turte an sawidun.

Mizoram P&E Minister chenna In-a an inkawmna ah hian Minister F. Rodingliana hian Ministry of New & Renewable Energy, Govt. of India hnuaia Small Hydro Project Incentive Scheme, Central Ministry in State Sorkar-a tanpuina a pekchhuah thin ennawn tura dah mek chu rang taka Central Cabinet in a pawm theih nan bawhzui dan tur a sawipui a. North East Regional Power Committee (NERPC) intawhkhawm leh hmasak berah he Small Hydro Project Incentive Scheme hi sawiho anih a, agenda a telh anih theih nan Chairman, NERPC a nihna anga hmalakpui tura sawmin, NERPC in Central Cabinet pawmpui tura chhawpchhuah anih theih dan turte a sawipui nghal a. Nadita Garlosa-i chuan Mizoram Power Minister rawtna chu pawimawh a tih thu sawiin, hmalak ho zel anih tur thu a sawi bawk.

Hei bakah hian Assam Power Minister hnenah Mizoram in kawlphetha siamchhuah kawnga a thlen chin leh hmachhawp awmte hrilhin, Indian Electricity Act hnuaia dan zam Renewable Purchase Obligation (RPO) pawh Mizoram in a la tihhlawhtlin theihloh avanga kumtin vaibelchhe tel Mizoram in a chawi thin thu hrilhin, he RPO hi Mizoram in a tlin ngei theih nan Hydro Power Project lamah hmalak nasat a tum thu a sawi a, hemi kawngah Central Ministry tanpuina tam thei ang ber Mizoram bakah North East States ten an dawn theihnan tanrual a tul thute a sawi bawk.