Home Minister in Forensic Science Laboratory tlawhin an hnathawh dan hrang hrang a enfiah

Home Minister K. Sapdanga chuan nimin khan MINECO-a Directorate of Forensic Science Laboratory chu tlawhin hun remchang hmasa ah thuam changtlun dan turte ngaihtuah a nih tur thu a sawi.

Home Minister hian FSL Conference Hall-ah FSL Officer te kawm hmasa in ‘FSL Annual Report 2023-24’ a tlangzarh a, hmasawnna in a rawn ken tel tak avangin pawikhawihna leh misual hnuchhui te a hautak sawt hle tih sawiin, Science thiamna hmanga uluk taka chhui a ngaih tak zel avangin Forensic Laboratory pawimawhna hi a pun belh zel tih a sawi a. Thawktute tam lovin indaih lo hle mahse India ramah misual hnuchhui kawngah Mizoram Forensic Science Laboratory te an hming that thu leh an chhuanawm thu sawiin, Directorate of FSL te mamawh te chu a hriat thu leh hun remchang hmasa ah thuam changtlun dan tur te pawh ngaihtuah a ni ang tih a sawi a. Tun dinhmunah erawh thawktute chu an indaihlohna ngaihtuah lovin an pawimawhna hrechiangin theihtawp chhuah zel turin a fuih a ni.

Home Minister chuan FSL Officer leh Staff te chu misual hnuchhui kawngah an pawimawh tluk zetin mi pawisawilo thubuai nei te chhuah zalenna atan hna pawimawh tak an thawk tih a sawi bawk a. Hei vang hian pawikhawihna leh misual hnuchhui kawngah Forensic leh Cyber Crime lam tihchangtlun chu a tul thu sawiin, Police te tha tichak lehzual tura thil pawimawh ber pawl an nih thu a sawi bawk.

Directorate of FSL-ah hian Laboratory pawimawh tak tak 8 awm mekin heng te hi Home Minister chuan a tlawh nghal a, heng te hi Chemistry Division, Fingerprint Division, Questioned Document Division, Ballistic Division, DNA Division, Photography Division, Toxicology Division leh Cyber Forensic Division te an ni.

Home Minister puala hun tawi hman hi Director H. Sapchhunga chuan a kaihruai a, an hmalakna leh hnathawh dan tlangpui te a sawi a. NDPS Act of 1985 hnuaia Notification thar berin a phut angin FSL-a Sample thehluh hi ni 30 (Ni 15 qualitative leh ni 15 dang quantitative) chhunga endikin, result siamchhuah hman tur a ni a. FSL thawktute chuan case a tam avangin Officer leh Staff tlem te in rim takin an thawk a, indaihloh a karah pawh State dang ten kum 10 aia tam te case tam tak an dah tawl (pending) laiin Mizoram-ah chuan case pending a awm lo a. India ramah FSL Mizoram chiah hi Zero Case Pendency ti la thei an nih thu an tarlang bawk.