MEFCOF General Assembly-ah Ramngaw leh nungcha humhalh tha te chawimawi an ni

Mizoram Environment & Forest Consultative Forum (MEFCOF) chuan nimin khan General Assembly hmangin Ramngaw leh nungcha humhalh kawnga hma la tha thlanchhuah te hnenah lawmman an sem bawk.

Aizawl I&PR Auditorium-a Mizoram Environment & Forest Consultative Forum (MEFCOF) General Assembly hi Environment, Forest & Climate Change Minister Lalthansanga chuan hmanpuiin ram leh mipui nun khawchhuahna atan leh hmasawn zelna atan pawha ramngaw leh nungcha humhalh a pawimawh thu a sawi a. Hemi kawnga MEFCOF in hun rei tak atanga rim tak leh mahni sum senga ramngaw humhalhna an lo buatsaih chu fakawm a tih thu sawiin, “Ram tana rohlu an chherchhuak takzet a ni,” a ti a. Hun lo la kal zel turah theihtawp chhuah zui tura kalkhawmte chu sawmin, Sawrkar nena thawhhona a nei zel tur pawhin a sawm bawk.

EF&CC Minister hian Ramngaw leh nungcha humhalh kawnga hma la tha thlanchhuah te hnenah lawmman semin MEFCOF hmalaknaa ramngaw leh nungcha humhalhna hmun (Ram Reserve) Zotheihuan 170 awm tawh zingah enkawl tha khaw 7 te hnenah lawmman sem a ni a, lawmman pakhatna chu Lalluaia Zotheihuan, Reiek hnenah hlan niin thuziak leh Rs. 30,000/- an dawng a, pahnihna Liana Zotheihuan, Neihdawn hnenah thuziak leh Rs. 20,000/- hlanin Kanghmun Zotheihuan chuan lawmman pathumna dawngin thuziak leh Rs. 10,000/- hlan an ni a, Ramlaitui/Dilmual/Melpuimual Zotheihuan, Ruantlang; Rozinga (L) Memorial Zotheihuan, Darlung; Khawlailung Zotheihuan, Khawlailung leh Milupuk Zotheihuan, Mampui te hnenah Consulation Prize hlan an ni bawk. MEFCOF hian Mizo zinga Environmentalist zinga entawn tlak thlanchhuah mi pali (4) te hnenah chawimawina thuziak an hlan bawk a, heng chawimawina dawngtute hi Bawihchhingpuii (Zotheihuan bul tantu); Romalsawma Hmar (Roma); Zira PC leh Vanramchhuangi (Ruatfela Nu) te an ni.

Nimin-a he hun hmanna ah hian District hrang hranga MEFCOF Sub-Headquarters leh Environmental Pawl hrang hrangte ASEP, BIOCONE, Save the Riparian, MENCO, STAM, MSDF, GMN, Mizoram First bakah ramngaw leh nungcha humhalh duhtute an tel a, ramngaw leh nungcha humhalh tura intiam tharna hun hmangin kum 2024-2026 chhunga an hruaitu tur thlanna an nei nghal bawk a ni.