Health Minister in World Blood Donor Day hmanpui

 Health Minister Lalrinpuii chuan nimin khan Aizawl Vanapa Hall-a 'World Blood Donor Day puala hun hman chu a hmanpui. Mizoram State AIDS Control Society (MSACS) leh Association for Voluntary Blood Donation (AVBD) te buatsaiha he hun hman ah hian Health Minister chuan damlo thisen mamawhtuten an hman tur anmahni taksa ami ngei sawr chhuaka midangte tana an thisen hlu tak hlan thin tute chu Mizoram mipuiten zahna chibai an buk tih sawiin, “Thisen thianghlim kan neih zel theih nan leh midangte tana kan luanchhuah zel theih nan kan nunphung tih hrisel nachang i hre deuh deuh ang u,” a ti bawk. MSACS Project Director report in a tarlan danin kum 1993 atang khan Mizoram-ah record neih tan a ni a, hemi kum 1993 hian thisen pek zawng zawng chu unit 3,119 a ni a, heng zinga Voluntary a pek chu Unit 56 niin zaa 1.8 chauh a ni a. Kum 2023 atanga 2024-ah chuan Voluntary Donation hi zaa 91.22 a tling tawh a ni.