Central Team ten Serchhip Mat Phai an rawn tlawh

Mizoram-a Horticulture Department hmalakna hrang hrang te hmuhpui tura Ministry of Agriculture & Farmers Welfare, Govt. of India atanga lo kal Central Team Member te chuan niminpiah khan Serchhip Mat Phai tlawhin Serchhip DHO R. Lalrintluanga leh a thawhpuite bakah Serchhip Mat Phai-a kuthnathawktu ten an lo dawngsawng.
He hunah hian Mat Phai a kuthnathawktu mi 26 telin an thlai chin leh an thar thin dan bakah an hralhchhuah dan te zawtin, harsatna an neih te pawh an zawt nghal a, thlai chigntu ten harsatna an neih te pawh a theih anga sutkian dan an dappui tur thu an sawi bawk. Heng Central Team te hian District thuneitute pawh kawmin ‘Centre of Excellence for Vegetable’ hmun tura ruahman Mat Phai pawh an tlawh nghal bawk.

Heng Central Team te hi Additional Commissioner, Govt. of India chuan rawn ho in Bamboo Processing Centre, Sairang leh Zo-Anthurium Growers Co-operative Society (ZAGCS) Collection Centre, Ramhlun North, Aizawl te an tlawh hnuah nimin khan Rb McCabe Hall, Aijal Club-ah Horticulture Minister Prof. Lalnilawma hovin an inkawm a. Horticulture Minister chuan Central Team-in Mizoram an rawn tlawh thei chu lawmawm a tih thu sawiin, Aizawl mai bakah Serchhip-a Zawlpui lam thlenga an kal thei chu an inpekna fakawm a tiin an tawnhriat atangin kan ram mil leh mamawh an zirchhuah ngei a rin thu a sawi bawk a ni.

He hunah hian Dr. Naveen Kumar Patle, Additional Commissioner, Ministry of Agriculture chuan Central-a policy duangtu an nih laiin a chhawrtute nen hun hman fo a tul thu te, heng atang hian sawrkar Policy thar duan a fuh ber thu te a sawi a. Tuna India rama Cluster Horticulture Development hmalakna kal mekah Mizoram pawh a tel ve theih thu sawiin, Mizoram chu dragon fruit ching zingah a rah a tui bik zia te pawh a sawi bawk a ni.