Ramdanga Zofa awm te huikhawm tul kan tih avangin Zo Diaspora Cell kan din - Chief Minister

Chief Minister Lalduhoma chuan Mizo thalaite chu ram danga hna sang leh zahawm tak tak te pawh thawk thei tura inbuatsaih tura fuihin, ram danga Zofa awm te chu huikhawm tul an tih avangin ‘Zo Diaspora Cell’ an din tawh thu a sawi bawk.

Ministry of External Affairs phalna nei-a din ‘Zofa Agency’ hawnna hun nimin-a Hyve Aizawl City Hall-a neih a hmanpuina ah Chief Minister Lalduhoma chuan kan ram economy a that loh avangin Unemployment a nasat thu leh Competition Exam-ah kan tlinh hlei thei si lova hna hnuaihnung zawk thlenga kan dap a ngai tih a sawi a. Kan thalai hna zawngte harsatna hriain rampawnah hna an thawh theih nan Mizoram sawrkar chuan kum 2015 khan ‘Mizoram Private Placement Agencies (Regulation) Act, 2015’ siamin chu Act-ah chuan ‘beyond the boundaries of Mizoram’ tih chu hmun hnih-ah ziahlan a nih thu leh chu dan hmang chuan Agency 27 hnenah phalna pek an ni zui ta tih a sawi a. “Kha dan kha kan thuneihna piahlam thil a ni tih hria kan awm lova, kan han kalpui ta a, harsatna kan tawk a, a lo lang fiah ta a ni. Agency te pawhin kawng dangin dan an lo bawhchhe ve bawk a. Women Commission ten thubuai an thehlut a, nikum lamah mi 29 te man an ni,” tiin Bail theih a nih avangin bail an nih thu leh Investigation tih vek tawh niin a hremna lam chu Mizoram sawrkarin prosecution sanction a tih theih loh avangin kumin January thla khan sawrkar laipuiah an dil thu leh tun thlengin a chhanna kan la nghak mek tih a sawi a ni.

Chief Minister chuan sawrkar-na an chan veleh khan heng licence te hi an Cancel tih sawiin, tumah licence nei an awm tak loh thu a sawi a. “Heng Agency thu-a kan harsatna te sutkian theihna awmchhun chu sawrkar laipui atanga dan ang thlapa Licence neih a ni ta a. Ti thei awm se kan duh em em a, Vawiin-ah chutiang ti thei Zofa Agency kan lo nei ta hi ka lawm hle,” tiin Mizo thalaite chu ram danga hna sang leh zahawm tak tak te pawh thawk thei tura inbuatsaih turin a fuih a, Skill Development uar tura chah bawkin, Taiwan, United Kingdom leh South India lam te-a Mizo thalaiten hna an thawh theih dan tur an dap mek thu pawh a sawi a. Ram danga Zofa awm te huikhawm tul an tih avangin Zo Diaspora Cell an din thu pawh he hunah hian sawiin, “CM Office atangin kan function dawn a ni,” a ti bawk.

Zofa Agency hi thianho paruk in an din a ni a, MEA License nei tur hian sum leh pai an seng nasa in, document a mamawh tam hle a. Hun engemaw chen an buaipui hnuah kumin January ni 30 khan phalna an hmu a, March thlaah Protector of Emigrants in an rawn tlawh a, Branch panga dang dil leh turin thurawn an pe a. Anni hian dil zui nghalin Branch panga approval hi an nghak mek a ni. An hnuaia kal te insurance tur pawh cheng nuaih 50 an dah a ni. Anni anga Ministry of External Affairs (MEA) phalna nei Agency hi India hmarchhak bial-ah pali (4) an awm mek a ni.