LADC hnuaia VC inthlanpui neih hun tur puan a ni

Lai Autonomous District Council (LADC) hnuaia Village Council 99 inthlanna leh Lawngtlai Chandmary MDC by-election chu tun thla ni 27 khian neih a ni dawn.

Mizoram State Election Commissioner Laima Chozah chuan chuan nimin khan Lawngtlai DC Conference Hall-ah LADC hnuaia VC Inthlanpui neih hun tur leh 12-Lawngtlai Chandmary MDC Constituency-a by-election neih hun tur hi a puang a, heng inthlan chuh tum te tan hian nimin khan hriattirna tihchhuah nghal niin inthlan chuh tum te tan hian tun thla ni 18 thleng khian hming pekluh theih a ni dawn a, hming pekluh te chu a tuk June 19-ah enfiahin tun thla ni 21 thlengin inhnukdawk duhte tan hun hawn leh a ni ang. Heng inthlanna neih turah hian June 27, 2024 zing dar 7:00 atanga tlai dar 5:00 thlengin Vote thlak hun hawn a ni anga, LADC hnuaia VC thlanna a Vote tla te hi chhiar nghal tur niin 12-Lawngtlai Chandmary MDC Constituency-a MDC by-election a Vote tla te erawh July 1, 2024-ah chhiar a ni thung ang.

State Election Commissioner Laima Chozah chuan India ram chu mipui rorelna ram (democracy) a nih angin rorelna chhawng hrang hrangah inthlan buatsaih thin a ni tih sawiin, Inthlan puan a nih tak avangin LADC huamchhungah Model Code of Conduct (MCC) hman tan nghal a nih thu a sawi a, Official-te, Political Party-te leh mipuite chu MCC inkaihhruainate tha taka zawm turin a ngen a. Inthlanna ah sum hmanga tlin tumna rilru pu lo turin Party-te leh Candidate-te chahin, harsatna an neihte chu SEC leh Official-te hnenah thlen thin turin a chah a. SEC chuan tan lam an neih dawn loh thu leh Dan ang zela an kal tur thu sawiin, dik taka inthlan kalpui a nih tur thu a sawi bawk a ni.