Serchhip District-a Primary Cooperative Society ten training neiin District Cooperative Union din a ni

Mizoram Cooperative Apex Bank (MCAB) buatsaihin nimin khan Serchhip District chhunga Primary Cooperative Society-a Share Holder te tan an hnathawh dan tur leh hmalak dan tur zirhona neih a ni a. Serchhip District Cooperative Union din nghal a ni.
Serchhip Kawnpui VC Hall-a he Awareness Programme hi Mizoram Cooperative Apex Bank-a Chairman Lalnunsanga Rokhum chuan kaihruaiin Mizoram-a Society kalpui dan hrang hrang leh an hmalakna te a tarlang a, Mizoram sawrkar in ruahmanna a siam tam takah Society te tangkai zawka hman tumna a nei chu lawmawm a tih thu leh Hand Holding Policy ah te pawh hman a tum chu lawmawm a tih thu a sawi bawk. He hunah hian MIZOFED Board of Directors Kawlhnuna chuan Serchhip District chhunga Primary Cooperative Society kalpui a nih mek dan te sawiin, tun dinhmunah Primary Agricultural Credit Society (PACS) a la tam tawk loh thu te a sawi a. PACS kaltlanga mipuite sum thawhkhawm atang hian pawisa dahtute chu a pung nen pekchhuah theih an nih bakah khawtlang mamawh thil pawimawh zual te Dan hnuaiah zawrh theih a nih thu te, a mamawh te hnenah sum puk tir theih a nih thu te a sawi bawk.


He hunah hian MIZOFED Chairman K. Rothangpuia pawhin Mizoram-a PACS kalpui a nih chhoh dan leh MIZOFED kalpui dan te sawiin, tun dinhmunah Mizoram-ah Petrol Pump 10 an neih mek thu leh hmun thum-ah a thar din belh tuma hma an lak mek thu a sawi a. LPG pawh hmun 6/7 velah Agent hna an thawh mek thu sawiin, Essential Commodity and Consumer Goods hnuaiah District tinah Wholesale dawn an neih deuh vek tawh thu leh Aizawl bikah Retail Outlet hmun 5-ah an neih thu a sawi a. MIZOFED chuan hun engemaw chen Serchhip-ah Petrol Pump bun tuma hma an lo lak tawh thu leh Sailiamkawn-a an ramah dah an tum thu sawiin, amaherawh chu thirban lian pathum lai sawn a tul thu leh cheng nuai 250 vel lai sen a ngai dawn nia a lan avangin harsatna an tawk tih a sawi a. Amaherawh chu Serchhip-a Petrol Pump siam tura hma an la lak mek thu te pawh a sawi a. MCAB Serchhip Branch-a Manager H. Lalnunthara pawhin MCAB chu mipuite ta, mipuite tana ding a ni tih sawiin, Serchhip mipui ten neitu chan an chan zel a pawimawh thu a sawi a. Society chhiatna thlen thintu chu sum leh pai a rinawm lohna a ni tih sawiin, PACS din chhoh mekah Bank nen kal hrang thei an ni lo tih hriaa rinawm taka an thawhho zel a duh thu a sawi bawk.

Serchhip District chhunga Primary Cooperative Society-a Share Holder kalkhawm hian Serchhip District Cooperative Union dinin hruaitu pawh insiam nghal a ni a. President atan H. Vanlalhruaia (Serchhip); Vice President atan mi 3- R. Lianchhawna (Khawlailung), PC. Lalzarliana (New Serchhip) leh Lalliana Sailo (Baktawng) bakah Treasurer-ah Laltlana (Keitum) te ruat an ni a, heng mite hian an thawhpui tur midang an la ruat belh leh dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man