AH & Vety Minister in Then-zawl-a Vety Farm a tlawh

AH&Vety Department changtu Minister C. Lalsawivunga chuan nimin khan Thenzawl-a AH & Vety Farm tlawhin tihchangtlun lehzual dan tur ngaihtuahin an hmalak mekna leh hmachhawpte a hmunah a enfiah.
AH & Vety Minister chuan Sa leh bawnghnute-ah Mizoram kan intodelh theih nan beihpuithlak a ni dawn tih sawiin, Sa-a kan intodelhna tura hmanraw pawimawh ber te zinga mi chu ranchaw (fodder) a intodelh hmasak a ni tih sawiin, Fodder hi a tam thei ang ber siamchhuah tum niin Thenzawl Vety Farm-ah chak taka hmalak tum a nih thu a sawi a. Kut hnathawktuten fodder hi an phurhchhuah ngai lovin an bawng vulhna hmun thleng Department motor-in a phurhsak anga, a fodder man chawi loin a phurhna atana Oil man chauh kut hnathawktute hian an chawi ang, a ti.

Thenzawl Farm-a ranchaw, Fodder plantation neih mek zau zawng hi 15 hectare dawn lai a ni a, hmarchhak State te zingah sawrkar hmalaknaa fodder plantation nei zau ber State kan ni a. Kumin atang hian nasa lehzuala hmalak tum niin Tin 40 hmun vela zauah fodder plantation neih belh tum a ni a. Heng atanga ranchaw siamchhuah te hi Mizoram hmun hrang hranga bawng vulhna hmunah te sem chhuah a ni dawn a ni.

Thenzawl Vety Farm-ah hian Se chi tha tihpunna tur buatsaih tum niin Tender chhuah mek a ni a. Tunah hian a pui paruk (6) leh a pa pakhat (1) dah mek a ni a. Kel tihpun tumin hmalak a ni bawk a. Rajasthan atangin Kel lian chi Sirohi leh Beetal lakluh a ni a. Kel chi tha, kum khatah no vawi hnih tal nei thei tur leh a pumraw lian tha siam chhuah tumin phai atanga Kel lian chi an lakluh te leh Mizo Kel vulh thin pangngai te inthlahpawlh (crossbreed) tir an ni a. Crossbreed hi a tahtawl a tih chhunzawm zel tur niin an that tawk leh tawk loh zir chiang a, enchhinna neih chhunzawm zel a ni dawn a ni. Mizoram in Vawk breed kan neih Zo Vawk chi a bo loh nan Vety Department hian Thenzawl farm-ah hian an vulh mek bawk a ni.