Kum 2023-ah nau piang 112 leh thi 42 awm

Kum kalta 2023 chhung khan District Hospital, Serchhip-ah nau piang 112 awmin mitthi 42 an awm.

District Medical Superintendent (DMS) Serchhip atanga thu kan dawn danin kum kalta 2023 January atanga December thla chhung khan District Hospital Serchhip-a Out-Patient Department (OPD)-ah damlo inentir 31,438 awmin Casualty-ah damlo inentir 7011 an awm a, heng bakah hian AYUSH OPD-ah inentir 3767 an awm bawk a, Laboratory-ah Test hrang hrang 79,705 tih niin X-Ray tum 3593 tih a ni bawk. 

Nikum chhung khan Serchhip District Hospital-ah hian naupiang 112 awmin January thla ah naupiang tam berin 15 an piang a, March leh April-ah nau piang 13 ve ve awmin August thla ah nau piang 4 chiah an awm nia chhinchhiah a ni thung. Nikum chhung vek khan District Hospital, Serchhip-ah hian mitthi 42 awmin April thla ah mi 7 thi awmin thi tam ber thla a ni a, May thla ah mitthi chhinchhiah tlem berin mi pakhat a thi bawk.