HSLC Exam Question-a thil felhlel awm nia sawi ah MBSE in Dan anga hmalak a nih tur thu a sawi

Mizoram Board of School Education (MBSE) chuan Pawl 10 zirlaite tana High School Leaving Certificate (HSLC) Exam neih meka thil felhlel awm ni a rin chungchangah dan anga hmalak an tum tih an sawi.

Kumin a HSLC Exam neih mekah hian Zirtawpni kalta khan zirlaite chuan Social Science Subject exam in he Subject-a Question siam chungchang hi Social Media lamah sawi zui a ni nasa hle a. Mizo Students' Union (MSU) General Hqrs. hruaitute chuan Inrinni khan MBSE Chairman JH. Zoremthanga kawmin thil awmzia an sawipui a, Pawl sawm exam a Question set Pattern leh School thenkhata Syllabus an inpek te Board Question nen a inang diak diak awm te chu Zirlaite leh School zirtirtu atangin MBSE rinlohna thlen thei anih thu an sawi a, Hetiang thil hi tunhma pawhin ngaihbel theih tura School thenkhat atanga Syllabus inpek fuh bik riau a thlen thin tawh thu leh hetiang thil avanga Admission thlenga nghawng thei thin a nih thu an hrilh a. He thil thleng hi Mizoram zirna quality leh Zirlaite Moral tichhe thei a nih avangin uluk taka chhuichiang tur leh Inquiry la a, hrem ngai an awm anih pawhin dan anga hrem ngei tura an phut bakah MBSE hmalakna hi an enzui zel tur thu an sawi bawk a ni.

Mizo Zirlai Pawl (MZP) General Hqrs. pawhin MBSE hnuaia HSLC Exam neih meka felhlel awm ni a sawi chungchang chu a ngai thutak hle tih sawiin, a tul anga enzuia hmalak an tum tih an sawi a, Social Studies Subject leh Subject danga Question Pattern felhlel awm leh Question hre lawk an awm anga sawi tur a awm hi pawi an tih thu an sawi a, zirlai naupang rilru thianghlim ten zirna kawnga inelna thianghlim an neih mek laia an rilru tihnual thei hetiang thil thleng hi chhui chhuaka, hmala vat turin hotute a ngen a ni.

MBSE Chairman JH. Zoremthanga chuan Board mawhphurhna a nih angin hmalak ngei tum a nih thu a sawi a. Vawiin-ah thuneitu sang zawkte nen dan anga hmalak anih theih nan inrawnkhawm tum a nih thu sawiin, MSU hruaitute chu lo ngaichang turin a ngen a, he thil thleng hi an ngaih thutak thu leh dan anga hmalak ngei a nih tur thu a sawi bawk.

School Education Minister Dr. Vanlalthlana pawhin HSLC Exam-a Question Paper felhlel deuh awm nia hriat chungchang hi sawrkarin a ngai thutak hle tih sawiin, a tul anga bawhzui mek a nih thu a sawi a. Question paper hi siamchawp nge siamchawp lo a nih tih enfiah a tul thu sawiin, a Question set tu, Zrtirtuten, an tidik lo ngei a nih chuan hrem ngai an awm a nih pawhin hrem a nih tur thu a sawi a ni. Minister chuan hun ala hlimchhawn em avangin hmalak zung zung theih a nih loh thu sawiin, Inrinni khan MBSE hotute nen an inhmukhawm thu leh tun dinhmunah chuan pawl 10 exam Question fel tawklo awm nia hriat chu a chhui tur din emaw, hmala tur bik siam an la awm loh thu a sawi a, a tul dan ang zelin hotu sang zawkte nen inrawnkhawma hmalak tum a ni tih a sawi a, zirlaite chu chi-ai loa an tihtur hma bak te tluang taka ti tura a duh thu a sawi bawk.