Minister in Muanna Veng-a Kudam leh Sairang-a Kudam lian sak mek te a hmunah a tlawh

Food Civil Supplies & Consumers Affairs (FCS&CA ) Minister B.Lalchhanzova chuan Inrinni zing khan Aizawl-a Government Muanna Godown Complex leh Sairang-a FCS&CA Godown tur sak mek te chu a hmunah a tlawh.

Government Muanna Godown Complex a tlawhna ah hian Supply Minister chuan thawktute kawmin an hnathawh dan te leh an harsatna neih te a ngaithla a. Thawktute chuan Kudam-a buhfai lakluh, dahkhawl leh phurhchhuah dan te an lo hrilhfiah a. Weighbridge hman mek hun engemaw chen hman theih loha awm tawh pawh enfela siamthat anih tawh thu leh lawmawm a tih thu Minister chuan a sawi a ni. Minister chuan Kudam thawmthat ngai lai awm te chu ngaihpawimawh hmasaka nei turin Department hotute chu a chah a, Manipur leh Myanmar khawtual buaina avanga buhfai demand sang chuan buhfai man tunhnaiah a nghawng nia an hriat thu a sawi a. Buhfai supply chungchangah Department lama thawktuten theihtawp an chhuah chuan rah tha tak a chhuah ngei a rin thu sawiin, hemi kawng ah hian ‘Bharat Rice’ lakluh dan pawh dap mek anih thu a sawi a ni.

Tun dinhmunah Government Muanna Godown Complex a Kudam te hi a vaiin Metric ton 1750 dah theihna a ni a. Khawpui thang zelah bungraw phurhluh leh phurhchhuah chungchangah te leh sum senso lamah a a ziaawm theih dawn zawk avangin Kudam hi Sairang Dinthar lama sawn tura hmalak mek anih thu Minister chuan a sawi a, GMG chu chhuahsan anih hunah pawh sawrkar in Kudam Complex ram chu uluk takin a humhalh chhunzawm tur thu leh ram leh mipui te mamawh leh hman tangkai ngei tur atan sawrkar in a hman tur thu a sawi bawk.

Hemi hnu hian Minister hian Sairang Dinthar-a FCS&CA Kudam tur sakna hmun pawh bialtu MLA leh Adviser to Chief Minister TBC. Lalvenchhunga nen an tlawh nghal a, Kudam hi avaiin pathum sak tur niin, a lian ber Metric Ton 1500 leng tur chu SASCI sum cheng vbc. 8.30 sengsa sak tur a ni a, March ni 28, 2026-a sak zawh tur niin Metric Ton 1000 ve ve lenna Kudam pahnih te chu NABARD hnuaiah cheng vbc. 4.4 senga sak tur a ni a, March ni 31, 2025-a sak zawh tura ruahman a ni bawk.

Helai hmun a tlawhna ah hian Supply Minister chuan hmasawnna ruhrel kan din reng rengte chu kan thlah te leh thangtharte tana chhawr leh hman tlak an ni tur a ni tih a sawi a. Adviser to Chief Minister TBC. Lalvenchhunga pawhin a bial chhunga Mizoram Sawrkarin Kudam a sa chu lawmawm a tih thu sawiin, Contractor leh Department lam te chu hna tha, Asset tling din ngei tura chahin a enzui tur thu a sawi a, he Kudam hian hnathawh tur tam tak a siam sak tur thu a sawi bawk.

Comments

Popular News (Last 30 Days)

Vawiin-ah HSSLC Exam result