AMC in Vawk vulh khuahkhirhna a kalpui zui zel

Aizawl Municipal Corporation (AMC) huamchhung-ah Vawk vulh khuahkhirhna siam a nih hnuah Vawk vulh ngaihnathiamna (exemption) dil an thahnem hle a, mi 8,017 ten dilna siamin phalna neilo te lakah dan awmsa khauh tak a kenkawh tum a ni thung.

AMC hmalakna in kumin January 15 atang khan AMC huamchhungah mipui chenna atanga ft. 100 aia hnaia Vawk vulh hi khap a ni a, amaherawh chu engemaw chhan bik avanga Vawk vulh ngaihhnathiamna dil duh tan January 2024 chhung dil theih a ni a, diltute chu Vawk an vulh lai leh vulhna hmunte February 2024 chhunga AMC leh LC aiawhte'n an endik hnuah phalna pek tlaka an ngaihte hnenah permit pek a ni dawn a, hemi hun chhung hian ngaihnathiamna dil mi 8,017 an awm a ni.

Vawk vulh khapna siam hnuaiah hian Vawk vulh laklawhte chu vawk len dan azirin tihral/talh hun tur chhut a ni ang a, chumi hmang chuan permit pek a, permit dam hun chhung chhut tur a ni. Permit dam chhung bak chu khuahkhirhna huamchhungah vawk vulh phal a ni dawn lo a. AMC huamchhungah mi dang tana hlauhawm leh hnawksak zawnga vawk vulhte chu Municipality Act Section 175 angin Rs. 2,000 thleng chawitir theih a ni a, an zawm loh zel chuan ni tin Rs. 200 chawi belhtir zel theih niin Section 178 hmangin ran In nei mumal lote chu Rs. 2,000 thleng pawisa chawitir theih a ni a, an siamthat loh chuan ni tin Rs. 200 chawi belhtir theih a ni. Hei bakah hian AMC Solid Waste Management By-Law, 2019 hmangin vantlang hmuna thenfai loha ran ek a awm chuan Rs. 5,000 thleng chawitir theih a ni bawk.