Five Star Hotel a awm theihna turin hmalak a ni

Tourism Minister Lalrinpuii’n Mizoram-ah Five Star Hotel a awm theihna turin hma an la tih a sawi a. Hetihlai hian kum kal mek 2023-24 chhunga Mizoram tlawhtu khualzin awm zat chu mi 1,54,916 an tling tawh bawk.

Assembly Budget Session neih meka a Department chanpual enkawlna tura sum ruahman sawihona hmawr a bawkna ah Tourism Minister chuan, Mizoram in khawmpui lian a thlen changin khualzin thlenna turah harsatna a awm thin tih a sawi a, chumi avang chuan Five Star Hotel din turin hma an lak thu leh chumi chungchang chu Chief Minister te nen sawiho a la ngaih tur thu a sawi bawk. Chief Minister Lalduhoma pawhin Five Star Hotel din duh hi an tam thu House-ah sawi ve bawkin, aw an la pawh lem loh thu leh ngen deuh hleka ngaihtuah a tul thu a sawi a. Tourist Lodge te mimal kut-a hlan a nih hnuah inelna a awm lo nia a hriat thu pawh a sawi bawk.

Tourism Minister chuan Mizoram-ah Tourism tihmasawn turin ruahmanna hrang hrang an nei tih sawi bawkin, MLA tin te chu an bial chhung theuh ah Tourist Village thlang tura ngen an nih tawh thu a sawi a. Rampawn khualzin ten mumal zawk leh ruahmanna tha zawka Mizoram an tlawh theihna turin Event Calendar siam a nih dawn thu te leh Tourist Vehicle Scheme pawh buaipui mek a nih thu a sawi a. “Tourist ten an rawn sawisel ber thin chu Tourist Vehicle Scheme kan nei lo hi a ni,” a ti bawk.

Tourism Minister tarlan danin, kum kal mek 2023-24 (December) thleng Mizoram tlawhtu khualzin awm dan chu Domestic Tourist 1,52,413 leh Foreign Tourist mi 2,503, an vaiin 1,54,916 an ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar