Minister in Sethawn-a Jordan Centre a tlawh

Social Welfare & Tribal Affairs, Women & Child Development Minister Lalrinpuii chuan Kolasib District chhunga ruihhlo ngaite enkawlna hmun, Jordan Centre, Sethawn chu Inrinni khan a dinhmun enfiahin a tlawh a. Thingdawl ICDS Project hmuna District Child Protection Office (DCPO), Kolasib hnuaia Observation Home leh Office thar sak mek leh Thingdawl-a Tourism Department hnuaia Highway Restaurant te a tlawh bawk.

Social Welfare Minister Lalrinpuii chuan, Jordan Centre chu fangin thawktute leh ruihhlo ngai enkawl mekte a kawm a. Thawktute nen an inkawmnaah hian tuna an dinhmun leh inenkawl dante sawiho a nih bakah rawtna an neih angte a ngaihthlaksak a. Ruihhlo ngaite enkawlna hmun chu tangkai leh changtlung zawka thuamthat a nih theih dan kawng zawn a tul tih a sawi a ni. Tun dinhmunah Jordan Centre-ah hian ruihhlo ngai enkawl mek mipa 22 leh hmeichhia 5 an awm a, kum 2022 February thla atang khan ruihhlo ngai enkawl tan niin tun thlengin mi 648 enkawl an ni tawh a. Centre Director nen thawktu mi 40 an awm mek a ni.