Health Care bill a pek tur sum la dawng lo

Mizoram sawrkar in damlo inenkawlna senso ba rulhna tur cheng nuai 40 a ruahman chu Mizoram State Health Care Society chuan an la dawng lo.

Nikum December ni 11-a Chief Minister Lalduhoma hova Finance leh Planning Department hotute thukhawm chuan Health Care Bill tang pekna tur cheng vbc. 40 hi an ruahman a. He ruahmanna anga sum an dawn tawh leh tawh loh zawhna chhangin Mizoram State Health Care Society hotute chuan, bill ba pekna tura sawrkar-in cheng vbc. 40 a ruahman chu sawrkar hmasa in SEDP sum atana a dah atanga pek tur a ni a, hei hi dan anga kalpui a ngaih avangin hun a duh rei deuh ni-a an ngaih thu an sawi a. Sum pekchhuah turah hian Planning Department chuan an tih tur chin a zo tawh a, hei hi Finance Department-ah thawn tawhin, sum hi pek chhuah theih tep beisei a ni.

Mizoram State Health Care Society hotute chuan, sawrkar hmasa in Health Care bill ba pekna tur cheng vbc. 60 a pek atangin cheng vbc. 35 an dawn tawh thu leh vbc. 25 dawn hmabak an neih thu an sawi a. Tuna ZPM kaihhruai sawrkar tharin cheng vbc. 40 a pek tur hi an dawn theih chuan damlo inenkawlna senso ba an neih te chu an pek tlak theih vek an beisei thu an sawi. Tun dinhmunah MSHCS hian damlo inenkawlna bill hi kum 2022 June thla thleng an pe tawh a, cheng vbc. 58 vel pek hmabak an la nei a ni.