Kawng laih in Vantlang thil a tihchhiat sawiho

National Highway-54 laihzauh leh siamthat meka mipui vantlang thil hrang hrang tihchhiat palh te chungchang chu nimin khan Hnahthial District Bawrhsap chuan he hna thawktu Contractor te a sawipui.

Hnahthial District Bawrhsap Chuauhnuna hian nimin khan a Pisa-ah National Highway (NH) 54 thuamthat leh laihzauh hna thawk mektu Contractor te hi kawmin he kawngpui laihzauh hna thawh mekin mipui vantlang thil hrang hrang a tihchhiat palh te sawiho a ni a, mipui vantlang in an hman Pavement te, Step leh Internal Road tihchhiat palh awm te endikna (assessment) nei thuai tura contractor-te chu hrilh niin a hma thei ang bera an assessment report thehlut vek tura hriattir an ni. Hei bakah hian NH. 54 kawng in a khawihchhiat te siamthat hna chu April ni 15 hma a zo vek tura hriattir an ni bawk.

Nimin-a thutkhawm ah hian National Highway-54 kawng a ram neitu, zangnadawmna (compensation) la tawh, an ram la chhuahsan lo te leh sawrkar ram lak chhunga In sa thar leh te, District Administration atanga ram chhuahsan tawh tura hriattirna lehkha (eviction notice) dawng tawh, la chhuahsan lo te chungchang pawh rel niin demolition atana mamawh khawl (machinery) te contractor ten lo ngaihtuah pui se an ti a ni.