Commerce & Industry leh P&E Department Minister in sawrkar laipui hotute a dawr

Commerce & Industry leh Power & Electricity changtu Minister F. Rodingliana chu New Delhi-ah zinin a Department hnuaia hmalakna tur hrang hrang sawrkar laipui hotute a sawipui.

Commerce & Industries Minister F. Rodingliana hian January ni 16, 2024 khan Dr. Arun Kumar Sarma, Director General, North East Centre for Technology Application & Reach (NECTAR) chu hmuin Mizoram thlai tharte lei leh hralh dan tur a sawipui a. Dr. Arun Kumar Sarma chuan Mizoram kuthnathawktute tharchhuah Sawhthing, Hmarcha leh Aieng te chu India ram chhung leh pawna hralhpui a inhuam thu lo hrilhin, a tam lamah harsatna a awm a rin loh thu a lo hrilh a ni.

P&E Minister ni bawk F. Rodingliana hian REC Limited-a Chairman & Managing Director Vivek Kumar Dewangan IAS pawh kawmin Mizoam chu State dangte nen inang a khairual theih a nih loh thu a sawi a, “Zalenna sual avangin kum 20 zet rambuai niin hmasawnna kal mumal thei lovin a thuanawp a, tunah chuan India rama state ralmuang berte zinga mi kan ni leh tawh a, chuti chung chuan sum leh paiah kan la harsa em em a, sawrkar hnathawkte hlawh pawh pe thei tawk tawk dinhmunah kan ding mek a ni,” tiin, State dangte aia tehfung thlah dul deuh turin a ngen a. A ngenna ngai pawimawhin 10% Utilization Certificate chauh pawh Department-in rawn thehlut se, Revamped Distribution Sector Scheme (RDSS) bikah chuan Second instalment a lo release tur thu Chairman & Managing Director REC Ltd. chuan a sawi a ni.

Modernization, Smart Metering leh Loss Reduction atana P&E Department-in DPR cheng vbc. 806 hu an thehluh chu a taka tihlawhtlin a tul thu pawh sawiin, Mizoram in power za zela 33 (33%) chuang Transformation loss kan neih thu leh Transfomer tam zawk za zela 72 (72%) lai chu kum 20 chuang a upa an nih tawh avangin a tihchangtlunna tur DPR an thehluh chu pawmsak ngei turin a ngen a. Vivek Kumar Dewangan chuan MP inthlan zawhah Minister thu thlente tihhlawhtlin ngei a tum thu a lo hrilh a. Un-Electrified Village/inhabitants (eng la luh lohna khua) a eng lakluhna tur DPR cheng vbc. 144 hu thehluh tawh pawh pek ngei a tum thu a sawi bawk.

Commerce & Industries Minister chuan Rajesh Agrawal, IAS leh Amardeep Singh Bhatia, IAS, Additional Secretary, Department of Commerce & Industry-te pawh kawm nghalin Indo-Bangladesh Border Trade leh Mizoram Sawrkar Policy chungchangte a sawipui a. Mizorama Thingpui huan siam leh tihhmasawn kawnga hmalak dan turte sawipuiin, a zirchiang tur leh hmalakho dan turte a rang lama enho a nih theih nana Mizorama Official leh mithiamte tirh an nih theih dan turte sawiho a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar