Vote chhiar ni tura ruat sawn a ni dawn lo

Election Commission of India (ECI) chuan Mizoram State Legislative Assembly Inthlanpui a Vote tla te chhiar hun tura December ni 3, 2023 (Pathianni)-a lo ruat tawh chu a sawn dawn lo niin Mizoram Chief Electoral Officer (CEO) Mahdup Vyas chuan a sawi.

Chief Electoral Officer Madhup Vyas-a hi Thawhlehni khan Delhi-ah chhukin Mizoram-a Kohhran leh pawl hrang hrangin Vote chhiar ni tura ruat sawn tura an ngenna chungchang ah Election Commission of India a zuk dawr a. Niminpiah khan Aizawl lo thleng leh tawhin, Vote chhiar hun sawn tura Kohhran leh Pawl hrang hrang ngenna chu ECI lam hian a tihlawhtling thei lo a, ruahmanna awm sa, December ni 3-a vote chhiar turin thutlukna a siam tih a sawi a ni.

Hetihlai hian NGO Coordination Committee-a tel pawl hrang hrang Office Bearer te chu nimin khan thukhawm nghalin an ngenna ngai pawimawh lo a Election Commission of India-in Mizoram Assembly inthlanpui vote chhiar hun a ngai anga kaltlangpui a tum chungchang hi an ngaih-tuah a. Vote chhiar ni hi sawn a nih theih na’n theihtawp an chhuah tur thu sawiin, bawhzui zel dan tur an rel a. A tul chuan ECI dawr tura Delhi a lamkal intirh chungchang pawh an sawi tawh a. Thutlukna erawh he thu buatsaih lai thleng hian hriat a ni lo thung. Vawi thum lai ECI hnena vote chhiar ni sawn tura ngenna siam tawh Mizoram Kohhran Hruaitu Committee (MKHC) hotute chuan ngenna an siam baka thil kalpui a ngai a nih chuan NGOCC kutah an dah tih an sawi a ni.

Tarlan tawh thin angin Mizoram-a Political Party-te, NGOCC leh MKHC te chuan inthlana vote tla chhiar ni atana ECI-in a ruat, December ni 3 chu Pathianni a nih avangin a tuk, December ni 4 emaw, ni 5-ah emaw a sawn turin vawi tam tak an lo ngen tawh a. Tun thlenga ECI lam atang hian chhanna mumal tak erawh an la hmu lo a, tunah chuan Vote chhiar ni hi kaltlangpui a ni dawn ta niin a lang a ni.