Mizoram Science Centre-in India ram a Science Talent Search lian Mizoram-ah buatsaih

India rama Science Talent Search Exam lian ber, Vidyarthi Vigyan Manthan (VVM) 2023 chu Mizoram Science Centre chuan Mizoram-ah an buatsaih.

Vijnana Bharati (VIBHA), National Council of Educational Research and Training (NCERT), Ministry of Education leh National Council of Science Museums (NCSM), Ministry of Culture te tangkawp ruahmanna hnuaiah Mizoram Science Centre hian pawl 6-11 zirlaite tan Vidyarthi Vigyan Manthan (VVM) 2023 hi October 29 leh 30 khan an buatsaih a, inelna chhawng khatna, School Level Exam hi Online hmangin Oct. 29 leh 30 khan buatsaih niin Aizawl District-a zirlai engemaw zatin exam hi an pe a ni, tun thla ni 11 khan result hi tihchhuah niin WM website - wm.org.in-ah en theih a ni.

He inelna in a tum ber chu zirlai naupangten Science thiamna, hriatna leh tuina lama hma an lo sawn theih nan a ni a. India ram pum huap Exam-a titha zualte chuan pawisafai lawmman an dawng dawn a, chu mai bakah India rama Science R&D Institution leh Laboratory tha-ah te Training leh Internship tihna hun siamsak an ni dawn bawk a ni.

Inelna hi Junior Group, pawl 6 atanga pawl 8 leh Senior Group, pawl 9 atanga 11 te tan neih a ni a, Class tinah hian a titha thlanchhuah zel niin inelna chhawng hnihna, State Level Camp Examination, Guwahati a tel turin Mizoram atangin zirlai panga an inziak tling a, chung te chu Junior Group atangin Riya Das, Class 8, Kendriya Vidyalaya Aizawl bakah Senior Group atangin C. Lalmalsawma (Class 11); Laldingngheta (Class 11); Jonathan Lalmuanthanga (Class 11) leh Zothanpuii (Class 11) te niin an vai hian Dawrpui School of Science & Technology zirlai te vek an ni.