Aizawl-ah Mizoram Fish Festival hman tan a ni

Mizoram Fish Festival chu nimin khan Aijal Club Park-ah hman tan a ni a, tualchhunga tharchhuah Sangha te mipuite tan man tlawm zawka zawrhchhuah a ni.

Ni 2 awh tur Mizoram Fish Festival hawnna hi nimin khan Fisheries Secretary C. Lalzahngoa hovin hman a ni a, he hunah hian Fisheries Secretary chuan National Fisheries Development Board (NFDB) in PMSSY sum hmanga Mizoram-a Sangha Kutpui huaihawt a nih theihna tura an hmalakna chu lawmawm a tih thu sawiin, he Festival hmang hian tualchhung dil Sangha khawitute leh Sangha kaihhnawih thila sumdawng thin te tan inphochhuahna hun tha tak buatsaih a ni thei chu lawmawm a tih thu a sawi a, tualchhung tharchhuah Sangha a pun zel thu leh Mizo mipuite pawhin an ngaihhlut deuh deuh thu a sawi. 

Fisheries Secretary C. Lalzahngoa chuan tualchhunga thar Sangha ngai pawimawh deuh deuh turin Mizo mipuite a chah a. October ni 10 atanga December ni 18 thleng hian Mizoram lui-a Sangha te an fuan hunlai, an inthlahpun hunlai a nih avangin Fisheries Department chuan Sangha man phal loh hun, Closed Season-a a puan thu a sawi a, hei hi mipuiten ngai pawimawh a, lui-a Sangha leh luidung nungchangte man lo turin a ngen a ni.

Mizoram Fish Festival hmannaah hian Mizoram aiawha Regional leh National Level-a Best Fish Farmers Award lo dawng tawhtu mi pali- Hmangaihthanga (Serchhip); F. Laldingliana (Champhai Kahrawt); Lalzamliana (Buhchang) leh Lalthanliana (Kolasib) te hnenah lawmpuina thuziak leh sumfai hlan a ni a. Vawiin-a chhunzawm tur Mizoram Fish Festival-ah hian tualchhung tharchhuah Sangha leh Sangha kaihhnawih thildang zawrhna dawr 10 hawn a ni. Report atanga a lan danin, Mizoram pumah Sangha Dil hectare 5000 chuang a zau a awm tawh a, kum khat-a Mizoram-a mamawh zaa 40 vel thar thin niin, a tlangpuiin Sangha Dil lian neituten an Sangha tharte chu phai lamah an hralh tam zawk a ni. 

Comments

Popular News (Last 30 Days)

Vawiin-ah HSSLC Exam result

LPG man bithliah thar