Kan Education System hi kan ram darthlalang a ni, Zirtirtute hian mawhphurhna sang tak an nei - Secy, Education

District Institute of Education & Training (DIET) Aizawl chuan nimin khan an kum 70 tlinna, Platinum Jubilee lawmin he hun hmanpuitu School Education Secretary Dr. Lalzirmawia Chhangte chuan kan Education System hi kan ram darthlalang a nih a vangin zirtirtute hian mawhphurhna sang tak an nei tih a sawi.

DIET Aizawl Platinum Jubilee lawmna DIET Aizawl Auditorium-a neih ah hian School Education Secretary Dr. Lalzirmawia Chhangte chuan DIET Aizawl-in kum 70 a tling ta chu a lawmpui thu sawiin, kan Education System hi kan ram darthlalang a nih a vangin Zirtirtute chuan mawhphurhna sang tak an nei tih a sawi a, “Hna dang hmuh loh avanga zirtirtu hna thawk ve ringawt, hlawh lakna tur chauha a run dal-a thawk satliah an awm anih chuan chung Zirtirtute chu kan ram leh hnam hmelma dik tak an ni,” a ti a. Teacher trainees te chu an training hun laia an zir te an thawhna School theuhah a taka hmang chhunzawm tura chahin, Thingtlang School- a thawkte pawhin Teaching Aids/Resources te duhthusam a awm remchang lo a nih pawhin Resource awm ang angte hmang tangkai thiam thei tura an in buatsaih a pawimawh hle tih a sawi a. DIET a thawk Zirtirtute chu Mizoram hma lam awm dan hriltu an ni thei tih hrilhin, “Kan Education System-ah hian thui tak mawh an phur a. Zirtirtute zirtir lehchhawngtu an nih avangin an dinhmun hi a pawimawh hle a ni,” a ti a. Quality Education tak tak nei thei tura pawimawh hmasa ber chu Zirtirtu, a hna zawng zawng a in pe a ni tih sawiin, Chutiang zirtirtu chherchhuaktu ni thei tura tan la sauh sauh turin DIET a thawkte chu a fuih bawk.

DIET Aizawl Platinum Jubilee lawmnaah hian khual zahawm School Education Director Lalsangliana pawhin DIET pawimawhna sawiin, mihring lo piang chhuak hmantlaka chherchhuaktu Zirtirtu chhertu a nihna chu a hlu hle tih a sawi a. “Zirna hian mihring nun laipui pawimawh tak a luah a, chuta a laimu chu DIET hi a ni,” a ti a. DIET kum 70 zet a nih takah chuan he hmun atang hian eng ang service nge an pekchhuah tih inenfiah a duh thu a sawi a. Khual zahawm SCERT Director Zohmingliani pawhin DIET hmasawn dan chu a fakawm tih sawiin, Primary zirtirtu training-na atana din kha B.Ed zirna petu a ni thei ta hial chu a lawmawm hle tih a sawi bawk.

Nimin-a DIET Aizawl Platinum Jubilee lawmna ah hian thawktute leh Training mek te, DIET a lo thawk tawh Principal leh Lecturer bakah lo Training chhuak tawh te, School Education Department-a Officer te, MBSE, SCERT leh Samagra officer te an tel a ni.

District Institute of Education & Training (DIET) Aizawl-ah hian zirlai D.El.Ed-ah mi 237 leh B.Ed-ah 99, an vaiin 336 an awm mek a, thawktu Teaching Faculty mi 38 leh Non-Teaching Staff 19, an vaiin 57 an awm mek bawk a ni.