Lengpui-ah State Biological Control Laboratory hawng

Cheng nuai 273.08 senga din State Biological Control Laboratory chu nimin zing khan Agriculture Minister C.Lalrinsanga chuan Lengpui Vengthar-ah a hawng.

Mizoram Sawrkar leh NABARD tangkawp ten an din State Biological Control Laboratory hawnna hunah hian Agriculture Minister chuan hlo Tur hmanga thlai eichhetu tihrem tuma hmalaknain hriselna kawngah nghawng thalo tak a thlen thin thu sawiin, mihring hriselna tura him zawk thlai eichhetu rannungte eichhe let vetu siam chhuahna tur, State Biological Control Laboratory hawn a ni chu Mizoram tana mellung pawimawh tak a nih thu a sawi a. Kum 2019-a Fall Armyworm (FAW) pangang puangin nasa taka Mizoram puma Vaimim chin a nghawng thu sawiin, hemi doletna kalzela Pangang thahna Biological Control Agent ttangkai zia hriatchhuah belh a nih hnuah ICAR-NBAIR, Bengaluru nena thawhhona hnuaiah State Biological Control Laboratory hi din a lo nih tak thu a sawi a. A puitlin theih nana ICAR-NBAIR Bengaluru, Department thawktute leh khawtlang hruaitute thahnemngaihna fakawm a tih thu leh Laboratory tihchangtlun leh enkawl kawngah lungrual taka thawhho zel a beisei thu a sawi bawk.

He hun hi Agriculture Secretary H.Lianzela chuan kaihruaiin Dr. K.Subaharan, HoD, CGU, Indian Council of Agriculture Research-National Bureau of Agricultural Insect Resources (ICAR-NBAIR), Bengaluru chuan thu a sawi bawk a. State Biological Control Laboratory din nan hian cheng nuai 273.08 ruahman a ni a, NABARD-RIDF-XXV sum cheng nuai 250.56 leh State Sawrkar atanga ruahman cheng nuai 22.52 sen a ni a. He project hian component pathum Laboratory Building, Type-IV Staff Qrts leh Laboratory bungraw leinate a kengtel a. Lengpui VC in ram an pekah hmalak niin M/s Eastmen Consultancy te'n he hna hi thawkin December ni 1, 2020 khan hna an tan a ni.

State Biological Control Laboratory hi himdam leh hrisel zawka thlai enkawlna tura hmalakna a ni a. Thlai eichhetu rannung hrang hrang (Pangang, Thlangdar, Vual etc.) te tiremtu tur anmahni that thei chi rannung (Parasitoids, Predator leh Biopesticide) leh hrik (Bacteria, Virus -NPV, Entomopathogenic nematodes leh Fungi) te Laboratory a tihpun leh heng Biocontrol Agent-te hi Loneituten uar zawka an hman theih nana tam zawk siamchhuah tum a ni a. Hriselna nghawng pawi thei hlo tur hman tihtawp a nih theih nana Loneitute banphaka Biocontrol Agent chhawpchhuah sak leh a hman dan zirtir te, Biological Control-ah hmasawnna a awm theih nana ICAR-NBAIR nena thawhho te, thlai hrisel leh himdam hlawk zawka tharchhuah kawnga hmalakte chu he Project tum pawimawh tak te zinga mi a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar