Chief Information Commissioner leh Information Commissioner bakah Lokayukta Member lalut

Mizoram State Information Commission-a Chief Information Commissioner (CIC) leh Information Commissioner bakah Lok Ayukta Member mi pakhat te chu nimin khan Mizoram Governor chuan a lalut.

Tunhnaia Mizoram sawrkar in thuchhuah siama a lo ruat tawh angin nimin khan Mizoram State Information Commission-a Chief Information Commissioner (CIC) atan John Neihlaia IPS (Retd.); Information Commissioner atan Mangjangam Touthang IIS (Retd.) leh Lok Ayukta Member atan Lalsanglura MPS (Retd.) te chu nimin khan Governor Dr. Hari Babu Kambhampati chuan Raj Bhawan Durbar Hall-ah a lalut a, hemi puala inkhawm neih ah Chief Secretary Dr. Renu Sharma chuan heng mi pathum te ruatna lehkha Mizoram Sawrkarin a tihchhuah te a hrang theuha a chhiarchhuah hnuin Larsap chuan Oath of Office tiamtir zelin a lalut a. Lok Ayukta Member atan Lalsanglura lakluh a nih hnuah CIC atan John Neihlaia lakluh niin Information Commissioner atan Mangjangam Touthang IIS (Retd.) chu lakluh leh a ni a. He hunah hian Chief Minister Zoramthanga leh Deputy Chief Minister Tawnluia bakah Minister leh MLA te an tel a. Sawkar hotulu pawimawh te an tel bawk a ni.

Chief Information Commissioner thar John Neihlaia IPS (Retd.) hi June ni 7, 1963-ah piangin thiamna lamah BA a ni a. Kum 1986-ah Mizoram Police Service (MPS) zawmin Mizoram Police hnuaia post hrang hrang a chelh hnuin kum 2011-ah IPS atana lakluh a ni a, Mizoram pawn – Delhi Police leh Arunchal Pradesh Police-ah te post hrang hrang a chelh leh a ni. December 2018 khan IGP-ah kaisangin a pension thlengin IGP a ni a. Kum 2019 khan President’s Police Medal for Meritorious Service a lo dawng tawh bawk a ni.

Information Commissioner atana lakluh Mangjangam Touthang IIS (Retd.) hi March ni 1, 1963-ah piangin thiamna lamah BSc. niin Diploma in Broadcast Journalism, Cardiff, Wales, UK atangte leh Journalism kaihhnawih thiamna IIMC atang leh hmun dangte bakah training hmun hrang hrang atangin a nei bawk a. IIS a nih chhung hian Aizawl, Kohima leh New Delhi-ah te AIR, DDK leh PIB ah te post hrang hrang a chelh a. Kum 1996 atanga kum 2006 thleng PIB Aizawl-ah a lo thawk tawh bawk a ni.

Lok Ayukta Member thar Lalsanglura MPS (Retd.) hi a service chhungin Mizoram Police hnuaia post hrang hrang a chelh bakah kum 2007 khan UN Mission Timor Leste Island-ah te a service a. Mizoram Lokayukta Act 2014 Amendment Drafting Committee ah Invitee Member a lo ni tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar