Aizawl Smart City hnuaiah hmalak mek zel a ni

Deputy Chief Minister Tawnluia chuan nimin khan Aizawl-ah mipui vangtlang tana tual lenna tur project lungphum phumin ‘Portable Fire Fighting Pump with Ancillary Equipment’ chu Aizawl khawpui chhunga YMA Branch te hnenah a hlan bakah Damdawi In tan 5G/Smart Ambulance a hlan bawk.

Aizawl Smart City Limited (ASCL) hmalaknaa MINECO Multi Level Parking bul hmun ruaka mipui vantlang tana tual lenna tur project ‘Construction of Urban Landscape & Avenue Plantation’ hi cheng nuai 972 senga hmalakna tur niin mipui vantlang tual lenna hmun hring leh nuam ni pahfawma Basketball (half court), Open Theatre, Skate Boarding hmun, Skywalk leh thil dangte awm tel tura ruahman tum a ni a. Khawpui huamchhunga YMA Branch 108 te hnena kangmei a chhuah palha a tihmitna tur hmanrua ‘Portable Fire Fighting Pump with Ancillary Equipment hi Central YMA hnenah hlan niin, a dangte pawh a lo thlenin a tahtawlin hlan a ni ang. Heng hmarua leh Fire Tender 4 lei nan cheng nuai 446 sen a ni dawn a ni.

5G/Smart Ambulance hi Aizawl Civil Hospital, Zoram Medical College bakah Private damdawi In 6 – Ebenezer Hospital, LRM Hospital, Trinity Hospital, Greenwood Hospital, Alpha Hopsital leh BN Hospital te pek tura ruahmanna a ni a, nimin khan pahnih chu Health & Family Welfare Department hnenah hlan a ni a, a dang paruk te chu tun thla chhunga hlan tum a ni. Heng Ambulance hi tunlai Ambulance changkang a ni a, damlo na tak tak phurh nana tunlai hmanrua leh thiamna tela thuam a ni a. Heng Ambulance 8 man hi nuai 698 hu a ni.

Heng puala inkhawm nimin-a MRB Conference Hall-a neih ah Deputy Chief Minister Tawnluia chuan Aizawl Smart City Limited hnuaia hmalakna hrang hrang te tarlangin, heng hmalakna leh ruahmanna kaltlanga Aizawl khawpui hmel thar lang mek chu lawmawm a tih thu a sawi a. Heng zinga Project tam tak, khawpui chhunga infiamna hmunhma thar hmun tam taka siam leh buatsaih mek te bakah tunhnaia khawpui chhunga College te tana Smart Classroom ruahman te chu thalai te pual a nih dan tarlangin, Smart City Project tam tak hian thalai te a tinzawn tih a sawi a. YMA Branch tinte kangthelhna hmanrua pek tura ruahman chu lawmawm a tih thu sawiin, YMA te chu chhiatrupna a thlen palha a che hmasa ber leh Sawrkar kut ke pawimawh tak an nih thu a sawi a. ASCL hmalakna tho in Fire & Emergency Services tan kangthelh motor 4 lei turin ruahman mek a nih thu a sawi bawk.

Smart City hnuaia project chu a hun pawhsei niin nakum June ah Project te hi zawhfel vek a ngaih chu Deputy Chief Minister chuan sawiin, heng hna te hi a hun taka an zawh thei nan theihtawp chhuaha tan khawh a tul thu a sawi bawk.