Assembly Speaker thurawn anga Independent MLA te bang an nih thu ZPM in an sawi

ZPM Party chuan ZPM thlawptu MLA panga (5) bang ta te chu khatihlaia Assembly Speaker Lalrinliana Sailo thurawn anga banna thehlut an ni tih sawiin, “Buaina awm miah lova ZPM Party Official Candidate ni tura inthlan chuh hi an thlang ta zawk a ni,” an ti.

Nimin-a Aizawl Press Club-a thuthar thehdarhtute a kawmna ah ZPM General Secretary Eddy Zosangliana chuan tunhnaia ZPM thlawptu MLA panga te MLA atanga an ban chungchang sawifiahin, “Heng MLA panga te hian Danin a phut anga MLA atanga banna thehlut an ni a. Kum 2018 MLA General Election dawna ZPM in Election Commission of India hnen atanga Party Registration an hmuh hman tak loh avanga ZPM Support Independent Candidate a dinga tling te an ni,” a ti a. India ram Danpui, Constitution (52nd Amendment), 1985, 10th Schedule-a chuang Anti Defection Law chu mipui thlan MP leh MLA ten a thlangtute phatsana party dang an zawm venna atana duan a ni deuh ber tih sawiin, ‘He dan hian Independent a thlantlin te pawh a phuar tho avangin ZPM thlawptu MLA te hi Dan ang chuan Independent atanga thlantlin MLA an la nih miau avangin, Party dangah an va in Candidate dawn chuan MLA an nihna atanga an ban a ngai a, an ban loh a, party dang atanga Candidate an nih a, ZPM Leader Pu Lalduhoma chunga thleng ang khan itsikna rilru pua hektu an lo awm leh palh hlauh a, buaina hmachhawn ai chuan Assembly Speaker Pu Lalrinliana thurawn angin banna thehluh a, buaina awm miah lova ZPM Party Official Candidate ni tura inthlan chuh hi an thlang ta zawk a ni,” a ti.

Assembly Speaker Lalrinliana Sailo khan Speaker a nihna atangin a bang dawn tih an MLA te kha a hrilh lawk tih pawh ZPM General Secretary chuan sawiin, “MNF Party rilru puthmang a hriatchian em avangin Speaker atanga a ban hma ngeia MLA atanga banna thehlut turin thurawn a pe a ni,” a ti bawk.

Hei bakah hian ZPM General Secretary Eddy Zosangliana chuan tunlai hian party pakhat in thubelhchiandawl lo leh rintlak loh tak tak hmanga mipui rilru hruaikawi tumin ZPM leh BJP te thawhdun tum ang hialin an sawi thin tih pawh sawiin, “Kan Leader Pu Lalduhoma leh Working President Pu K. Sapdanga ten an lo sawi fo tawh angin, Mizoram-a Party lian 3 zinga Central thuhnuaia kun ve lo party awmchhun chu ZPM party chiah hi kan ni a. MNF chu BJP thuhnuaia kun an ni a, Congress lah an Candidate tur thlenga anmahni pawha tifel thei lo, Central pawmpui ngai an ni. ZPM hi Tualto Party awmchhun, Central a zawmpui nei lo, Mizoram pelh ngai lova Mizoram chhung atanga mahni a thutlukna engkim siam thei awmchhun kan ni,” a ti bawk.