Congress Party in an Candidate turte puangin Manifesto 2023 an tlangzarh nghal bawk

Congress Party chuan Mizoram MLA Inthlanpui-a an Party Candidate turte chu nimin khan an puang ta a, hemi rual hian an Manifesto pawh tlangzarh nghalin MPCC Vice President Lalnunmawia Chuaungo chuan kum 5 chhungin thalai nuai khat tan eizawnna mumal tak an neih theih nan zirtirna tha tak pek hman ngei an tum thu a sawi.

Aizawl-a Congress Bhawan Conference Hall-a Congress Party in Mizoram MLA General Election 2023-a INC Official Candidate puanna leh Manifesto 2023 tlangzarhna hun nimin-a an hman ah hian MPCC Sr. Vice President Lal Thanzara chuan Mizoram Assembly Inthlanpui-a an Party Candidate turte chu chhiar chhuakin an party Manifesto chu a tlangzarh nghal bawk a. Congress in MLA an neih lai mi 4 te chu an Bial ngai ah an ding leh vek dawn a, MPCC President Lalsawta chu Aizawl West-III ah dingin Candidate zingah MLA lo ni tawh mi 9 an awm bakah inthlan hmasa a in Candidate tawh mi 4 an awm a, a vawi khatna atana in Candidate tur mi 23 an awm a. Nimin lama an Candidate tur an tlangzarh kan rawn tarlan tawh bakah Lunglei South Bial-ah Meriam L. Hrangchal chu a ding dawn bawk a ni.

Nimin-a he hun hmanna ah hian MPCC Vice President Lalnunmawia Chuaungo chuan Manifesto chungchang sawi zauin, “Congress Party hian mi hausa leh khawsa thei sate aia kan ngaih pawimawh zawk mi rethei leh mi hnuaihnung zawk te dinchhuah hi kan duh ber a ni,” tiin Tang puihna kalpui an tum thu a sawi a. Eirukna (Corruption) tih bova tun aia chak zawka Lok Ayukta thuamchak an tum thu sawiin, “Langtlang sawrkar (Transparency Govt.) din a, sum leh pai-ah pawh buai lova sawrkar hnathawkin a hun taka hlawh an lak leh theihte hi kan ngai pawimawh em em a ni,” a ti a. “Thalaite tana hna siam hi kan ngai pawimawh hle a. India ram leh India ram pawn thlenga thalaiten hna an thawh theihna atan inzirtirna (Training) kan buatsaih dawn bawk a. Kum 5 chhungin thalai nuai khat tan eizawnna mumal tak an neih theih nan zirtirna tha tak pek hman ngei kan tum a ni,” a ti bawk.