Parliament thutkhawm-a tel Mizoram MP te MNF Party in Lengpui-ah an lo hmuak

Parliament thutkhawm neih zawh a nih hnuah Mizoram MP pahnih te chuan Inrinni khan Aizawl rawn thlengin MNF Party chuan Lengpui Airport-ah an lo hmuak a ni.

Lengpui Airport a Mizoram MP pahnih te hmuahna hunah hian Mizoram Lok Sabha MP C. Lalrosanga chuan All Party Meeting-ah Manipur chungchang sawichhuah ngei ngei a duhthu a thlen tih sawiin, “Amaherawhchu, khulam hotuten Manipur chungchang sawichhuah an khap ve tang tang a, kan tum angin sawichhuahna hun min siamsak duh ta lo a, No-Confident Motion-ah thusawi ka dil a, min phalsak lo a, Manipur MP pahnihte ngei pawh hun pek an ni lo a, kan unaute tihduhdahna hmun Manipur sawrkar hi awm tawh lo se, tih hi kan duh dan a ni,” a ti. Manipur-a harsatna leh manganna nasa tak tawk Zohnahthlakte thlavang hauha theihtawp chhuah chu MP an nihna anga an tih ve theih anih thu Lok Sabha MP chuan sawiin, “Kan unaute thlavang hauh nan Mizoram mipuiten min thlawp avangin huaisen takin kan awm a, kan tih theih china kan tih tur chu Mizoram tan kan ti zel dawn a ni. Congress hi kan tana kan support vang ni lovin Manipur-a kan unaute kan thlawp vangin an Motion putluh kha kan lo tawmpui mai chauh a ni,” a ti bawk.

He hunah hian Rajya Sabha MP K. Vanlalvena pawhin Union Home Minister-in Manipur a buaina thlen chhan chu, Hnamdang (foreigner) mi, a bik takin Myanmar mi te avang niin a sawi tih sawiin, Manipur-a Kuki te chu foreigner an ni lova, a ram leilung fate ngei an ni tiin House-ah a sawifiah tih a sawi a. “Tun tum Session chu kan Chief Minister berin a tawp thlenga NDA do tura thu min chah a nih tlat avangin, Manipur issue hi thil thleng satliah nilovin, tum lawk sa vek a thil thleng nia kan hriat avangin na takin kan do a ni,” a ti bawk.

Forest Conservation Amendment Bill pass a nih laia Parliament House-a a awm loh chhan sawifiahin Rajya Sabha MP K. Vanlalvena chuan, Forest Bill hi chawhnu Session-ah pass a nih thu a sawi a, “Session tan a ni chiah a, eptu lamin Manipur chungchang sawiho an phut a ni. Chairman-in sawiho a remtih loh avangin an chhuak vek a, chumi hnuah Bill hi an pharh. Bill pass laia awm ka duh loh avangin eptu ho rual loin, a hnuah ka chhuak,” a ti a. “Eptuten bill an pass tur an duh loh avangin House an chhuahsan fo a, an thlawp vang kan ti ngai lo. An dodal vang kan ti thin zawk,” a ti bawk.