Issue based in NDA-ah kan tel, an thu a zirin kan thlawpin kan thlawp lo mai - MNF President

MNF President Zoramthanga chuan, “NDA-a kan tel dan hi issue base-in kan tel mai a, an thu a zirin kan thlawpin kan thlawp lo mai,” a ti.

Mizo Hnam Run, Aizawl-a Chhung Inkhawm nimin a neih ah MNF President Zoramthanga chuan India sawrkar paihthla tura Parliament-a No-Confidence Motion thehluh chungchang sawiin, “Mipui in MNF chu NDA-ah a tel avangin an thlawp a ngem, thlawp lo ang em tih an ngaihtuah nasa a. MNF MP-te chet dan chu kan hriat vek kha. Central-ah pawl lian tak pahnih UDA (Congress telna) leh NDA (BJP len berna) a awm a, keini chu Congress telna a awm chi kan ni lo hrim hrim a. NDA-a kan tel dan hi issue base-in kan tel mai a, an thu a zirin kan thlawpin kan thlawp lo mai. MNF chu Pathian leh kan ram tan tia nghet taka thuthlung vuantu kan ni,” a ti.

MNF President chuan CAB pawh Mizoram-ah hman duh lovin an do thu leh an hmang lo tih sawiin, “UCC pawh NDA chhawpchhuah ni mahse; kan vote pui lo. Prime Minister hnenah lehkhate pawh ka thawn a, kan duh loh leh kan do dawn tih nasa takin ka hrilh mai a ni. Tun tum Parliament-ah No-Confidence Motion bulpui ber kha Manipur issue a ni a. Central-a Opposition in an putluh kha kan thlawp mai a ni,” a ti a. “Assam Chief Minister pawh Union Home Minister in a rawn tirh anih ka ring a, min zawta kan do tur thu ka hrilh a. Opposition lam kan thlawp tur thu tlang takin ka hrilh a. Assam Chief Minister chuan absent mai turin min ngen a. Pu C.Lalrosanga kan MP (LS) pawh a nu damlo ICU-ah a awm lai ni mahse: tel luiin a thlawptuah a tang a ni,” a ti.

NDA-a an tel ve avangin a chhung atangin na takin an bauh ngam tih pawh MNF President chuan sawiin, “MNF chu NDA kan tel avangin Pu Modi-a thu thu a kal kan ni ve lo. A hma pawh khan an duh loh em em Burma lama kan unau raltlante pawh an ei leh in, silh leh fen nen khawvel hriatah kan pek tur thu kan puang a. Pu Modi-a hnenah pawh ka nute lama ka nu nuta pahnih chu Burma ramah lu an phum thu ka hrilh a. Burma refugee te tanpuina turin Crore 10 ka dil laiin, Crore 3 chauh min pe nghe nghe a ni. Kan Chief Secretary pawhin Central a dawr dawn khan min rawn be hmasa a. Kum 1970-71 chho khan East Pakistan atangin a maktaduai tel lopuitu kha India sawrkar a ni a. In tih ang khan kan lo pui ve mai ti rawh tiin ka chhan tir a, huaisen taka keini anga Pu Modi-a do ngam hi an awm ve lo,” a ti bawk.

MNF Party in thuchhuah siama an tarlan danin nimin-a he hun hmanna ah hian ZPM PAC Member ni thin Zosangliana leh Phairothanga te bakah ZPM General Hqrs. Adviser ni thin te leh midangte MNF-ah lawmluh an ni bawk.