Serchhip District chhunga kum 1-19 te hnenah Rulhut hlo pek beihpui thlak tan a ni
National De-Worming Day hawnna hi Serchhip-ah chuan nimin chawhma dar 10:30 khan P&E Veng Anganwadi Centre No. I-ah neih niin he hun hmanpuitu Serchhip ICDS Project-a CDPO Caryll Lalpari chuan Health Department leh ICDS te chu thawkho leh hnathawh pawh inzul tak an ni tih sawiin, naupang an enkawlna kawngah naupangte hriselna kawnga Department pawimawh an nih bawk avangin an tel lo chuan hna pawh thui tak thawh a harsat thu a sawi a. Mihring in Rulhut kan pai avanga harsatna kan tawh theih te tarlangin, Rulhut kan pai lohna tura thianghlimna leh Rulhut hlo ei thin a pawimawh zia kan hriatna kawngah nu ten an mawhphurhna leh an pawimawhna an hriat a tul thu a sawi bawk.
National De-Worming Day hawnna puala inkhawm hi Serchhip CMO Dr. LP. Malsawma chuan kaihruaiin Serchhip District Hospital-a Naupang lam thiam bik Doctor, Dr. C. Lalrinzama chuan Rulhut in mihring taksa-a harsatna hrang hrang a siam theih dan leh invenna te a lem nen a sawifiah a. Mihring taksa chhungah Rulhut a lo awm a nih chuan kan taksa tana eitur tha kan ei ang ang te a lo ei ve zel avangin mihring a hrisel theih loh thu leh thisen tlakchhamna te a thlen theih thu a sawi a. Kan thil ei atanga Rulhut hi pai theih a nih avangin thil kan ei dawnin kut silfai a pawimawh thu leh thil hel ei chi reng reng ei hmaa silfai uluk a tul thu a sawi a. Rulhut pai tan Rulhut hlo ei a pawimawh thu leh ram hrang hrangah an ei dan inang lovin India ramah chuan kum khat-ah vawi hnih ei tura ruahman niin, kumin ah a thawh khatna atan February thla khan National De-Worming Day hi hman a lo nih tawh thu a sawi a. National De-Worming Day hi kum 2015 khan India ramah kalpui tanin Mizoram-ah chuan 2016-ah kalpui tan a nih thu a sawi bawk.
Nimin-a National De-Worming Day hawnna neih a nih hnu hian Anganwadi Centre-a naupang te hnenah Rulhut hlo pek nghal a ni a. Serchhip CMO Office-a DEIC Manager Lianthangpuii Fanai chuan Rulhut hlo hi Serchhip District-a Anganwadi Centre zawng zawng leh zirna In hrang hranga kum 19 hnuailam te hnenah pe turin semchhuah vek a nih tawh thu leh mi 22,458 hnenah pe tura ruahman phawt a nih thu a sawi a. Zirna In-a kal tawh lo te pawh Veng tin leh khaw tina ASHA ten an chenna In-ah tlawhchhuakin pek vek tur a nih thu sawiin, hei vang hian ruahman lawk aia tam Rulhut hlo hi an pek a rinawm thu a sawi bawk.
Comments
Post a Comment