Eirukna thubuai ah Dr. N. Palai thiamloh chantir a ni

National Rural Health Mission (NRHM) Director hlui Dr. N. Palai chu eiru-a puhna thubuai-ah thiamloh chantir niin Bail-a a lo chhuah tawhna chu hnawlin Jail-ah dahluh nghal a ni a, karleh Thawhtanni-ah a hremna tur puan a ni ang.

Aizawl District Court-a Special Judge (Prevention of Corruption Act) Dr. HTC. Lalrinchhana chuan niin khan Dr. N. Palai thiamloh chantir a nih thu hi puangin Court thutlukna-a tarlan a nih danin, he thubuai hi January 13, 2010-a Superintendent of Police, ACB hnenah PRISM President Vanlalruata leh PRISM General Secretary RL. Liantluanga te thubuai thehluh atanga intan niin khatih hunlaia NRHM Mission Director leh Health Services-a Director Dr. N. Palai laka thubuai thehluh a ni.

Dr. N. Palai hi October, 2009 khan a tak awm si lo a tum li lai Workshop nei leh sum senso Rs. 4,19,360 chu eiru-ah a puh a niin, Rs. 4,19,360/- a lo kawl, hnuchhui a nih avanga Account Aection lama a lo dahlet leh chu ACB-te hian an man nghe nghe a. Kum 2008-ah Contractor pawh ni lo Hunliannghaka, Baktawng hmingin Health Sub-Centre 10 thawmthatna tur hna pechhuakin a vaiin Rs. 35,40,000 man a ni a. He hnathawhna bill hi Hunliannghaka hmingin cheque-a pekchhuah a ni na a, Mizoram Rural Bank, Dinthar Branch-a Dr. N. Palai-a Bank Account kaltlanga lakchhuah a ni thung a. Melriat Sub-Centre, Keitum Sub-Centre leh Dampui Sub-Centre te hi a bikin an hnathawh leh sum sen hi a inmil lo hle tih hmuhchhuah a ni a. A lo berah Rs. 11,85,533 hleprukna hmuhchhuah a ni.

Kum 2007 khan Lalrinliana, Republic Veng, Aizawl hmingin PHC 19 zet te thawmthatna tur Work Order pekchhuah niin Damdawi In pakhat zel tan Rs. 50,000 zel hisap niin Bill lem hmangin cheng nuai 9.5 chu lakchhuah a ni a, he pawisa hi a hmanna tura hman a nih loh bakah Dr. N. Palai-a hnenah hlan a ni a. Lalrinliana hian a hminga hnachhuak hi a lo hre lo hrim hrim bawk a. PHC 15 te hi thawmthat an ni lo hrim hrim tih hmuhchhuah a ni bawk.

August, 2007 leh October, 2007 chhung khan PHC 36 te rawng hnawih thatna tur PHC pakhat atan Rs. 50,000 zel hisapin bill lem siam a ni a, heta PHC 24 te hi a taka rawng hnawih that ni miah lo niin hemi atana ruahman sumpai hi eiruk ni ngei a hmuh a ni bawk.

Heng puhna hrang hrang ah hian Court chuan ACB lam hian an thubuai hi an finfiah zo tiin thutlukna siamin Dr. N. Palai hi thiamloh chan tir a ni a, ACB te pawisa man Rs. 4,19,360 hi sawrkar pawisa tura chhuhsak nghal a ni bawk a. Sawrkar kalphung ang ni lo a Computer pahnih leina thu ah erawh Criminal thubuai ah thiam chantir a ni thung.