ZPM Thalai in Lokayukta-ah complaint an thehlut

ZPM Thalaite chuan 'Component 1 of Development of Immediately Required Infrastructure for Tourist Development at Reiek Tlang' chungchangah nimin khan Lokayukta-ah complaint thehlutin a changtu Minister Robert Romawia Royte chu insawifiah tura an phut thu an sawi.

ZPM Thalaite chuan tun thla ni 14 khan Tourism Department hnuaia Reiek tlang-a hnathaw hrang hrangte an enfiah thu sawiin, Component 1 of Development of Immediately Required Infrastructure for Tourist Development at Reiek Tlang tih ah hian sanction amount cheng nuai 560 dah niin hna hmutu hi DJ Consultancy Services, Peter Street, Sikulpuikawn an nih thu leh Restricted Tender hmangin hna hi pek a nih thu sawiin, hei bakah hian Departmental Work leh PWD Poject Division-I atanga hnathawh cheng nuai 114.4 a awm bawk tih an sawi a. DJ Consulatncy Service hna hmuh hi kum 2020 atanga thawh tan a nih thu leh thla 18 chhung, December 2021 ralhmaa thawh zawh tur niin, hun tiam chhunga an zawh theih loh avangin hun dil belhin thla 13 chhûng pek belh an ni tih an sawi a. He hna hi Works Components 12-ah then niin, sanction amount leh hnathawh hrang hrangte a inmil lo hle-ah an ngai tih an sawi a ni.

ZPM Thalaite chuan Work Components 12 zingah Main Gate siamna atân cheng nuai 53.07 leh Parking Area siamna atâna cheng nuai 148.70 dah leh an hnathawhte chu thil awm lo lutuk leh sum siamna dik takah an ngai tih sawiin, Work Components zinga Construction of Parking Approach cheng nuai 18.94 leh Repair and Renovation of Amphitheather cheng nuai 95.61 zet senna-te phei chu a awmna hmun hi an hmu zo lo tih an sawi a. Reiek tlâng-ah DJ Consultancy te hian an hnathawh hi Total Estimate Amount-ah cheng nuai 560 a nih lain RTI chhannaah chuan pawisa hmanna hi cheng nuai 447.22 chauh niin cheng nuai 82.78 lai a hmanna tarlan a ni lo tih an sawi bawk.

Heng hna bakah hian kum 2022 khan Department Work-in nuai 81.68 man zet sawrkârin a ruahman leh thu pawh ZPM Thalaite chuan sawiin, component 9 a then darh a nih thu leh heng ah te pawh hian sum ruahman leh hnathawh chu a inmillo hle nia an hriat thu an sawi a. Hetiang zat sen a nih tawh hnuah pawh hmasawnna tam tak hmuh theiha a awm beisei a nih laiin, kum 2022 vek khan 'Repair and Renovation of Reiek Tourist Lodge & Zokhua' atan nuai 32.48 lai mai PWD Project Division-I atangin sawrkârin a ruahman leh a nih thu an sawi a, heng pawisa te hi eng atan nge hman a nih an hriat loh thu leh Zokhua cheithatna atâna nuai 10 chuang dah ni si hnathawh mumal hmuh tur awm lo-te, Cafeteria atana nuai 2.65 ruahmante, Rest Hut Roof siamna atâna nuai hnih dawn senna te chu thil awm lo tak nia an hriat thu te an sawi a ni.