MCAA Silver Jubilee Chheihlam Intihsiakna neih a ni

Mizo Cultural Artistes' Association (MC-AA) in kum 25 a tlin lawmna atana Art & Culture Department leh MCAA tangkawpin ‘MCAA Silver Jubilee Chheihlam Intihsiak-2023’ an buatsaih hmawr bawkna chu nimin khan Aizawl Vanapa Hall-ah neih a ni a, Art & Culture Minister R. Lalzirliana chuan khuallian niin a hmanpui a ni.

Nimin-a he hun hmanna ah hian Art & Culture Minister chuan Mizo hnam lam leh zaite hi Mizote min tipumkhattu leh hnam-a kan chian lehzualna tur atana pawimawh tak a ni tih sawiin, Mizo hnam lam leh zai reng reng hi sum leh pai peipunna atana hman tum kher lova, mahni insenso zawk huama midangte hnena pholan duhna rilru kan neih hian kan hnam a dam ang, a ti bawk.

Chheihlam Intihsiakna-ah hi Category chi hnih - kum 16 hnuailam leh kum 17 chunglam tan neih niin hla rang leh hla muang hmangin intihsiakna hi neih a ni a. Kum 16 hnuailam-ah kawp 20 telin C. Laldintluanga leh PC. Lalremsangi, East Lungdar chu pakhatna an ni a, mipa lam thiam berah F. Lalhruaitluanga (k-8), Saihnuni Sailo Memorial School, Bungkawn, Aizawl leh hmeichhia lam thiam ber-ah Lalhmangaihsangi, Mamit Dinthar te thlan an ni. Kum 17 chunglam ah kawp 33 telin Vanlalrinnunga College Veng & Jenny Lalnunthari, Dinthar, Aizawl chu pakhatna an ni a, mipa lam thiam berah Vanlalrinnunga, College Veng, Aizawl leh hmeichhe lam thiam berah Jenny Lalnunthari, Aizawl Dinthar te thlan an ni bawk.