Mizoram CEO in Assembly inthlanpui atana Champhai District inbuatsaihna a hmunah a enfiah

Kumin-a Mizoram State Legislative Assembly inthlanpui lo awm tur atana inbuatsaihna leh hmalakna te enfiahin nimin khan Chief Electoral Officer (CEO), Mizoram Madhup Vyas IAS chuan Champhai District a tlawh.

Mizoram CEO hian Champhai DRDO Conference Hall-ah District Election Official-te kawmin Mizoram-ah inthlanna muanawm tak leh felfai tak neih a ni tawh thin a, hemi chhawmnung zel tur hian thahnem ngai taka kan tanrual a pawimawh a ni, a ti a. District Election Officer thahnemngai tak kaihhruaina hnuaiah Election hmalakna te tha taka kalpui a ni chu lawmawm a tih thu sawiin, Champhai North Assembly Constituency chhunga Polling Station thenkhat, District thar Khawzawl District huamchhunga awm te pawh la kutkena ngaihven zel a ngaih thu a sawi bawk.

Kum 2018 MLA General Election-ah State puma vote tla chawhrual aiin Champhai District-a vote tla zat percentage a tlem thu leh tanlak a ngaih thu CEO chuan tarlangin, kumin MLA General Election-ah vote tla percentage a san theih nan SVEEP Plan mumal tak nei a, mipuite hnena vote thlak theuh tura sawmna siam mai bakah vote thlak tura mamawh leh tul dangte tam zawk chhawpchhuah a pawimawh thu a sawi a. Election Commission of India-in inkaihhruaina a siamte ngaipawimawha zirchiang tur leh ngaihven zel thin turin Election Official-te a chah bawk.

He hunah hian District Election Officer (DEO) James Lalrinchhana chuan an District dinhmun tarlangin, an District-ah Assembly Constituency pathum (3), 23-Champhai North, 24-Champhai South leh 25-East Tuipui te niin January ni 13, 2023-a Final Electoral Roll tlangzarh ah voter 56,362 an awm thu a sawi a. Polling Station 84 a awm mek thu leh heng zinga 6, Champhai North AC ami te chu Khawzawl District-ah an awm thu a sawi bawk.

CEO hian DC Office tlawhin EVM khawl dahna Strong Room, Vote chhiarna tur Counting Centre leh inthlanna kaihhnawiha mamawh tur hrang hranga ruahmanna kalpuite a enfiah a. Chawhnu-ah Polling Station thenkhat te tlawhin inthlan nana hman tur a nih angin danin a phut tui, power supply, ramp, inthiarna leh tul dang te a awm tha em tih a endik nghal bawk a ni.

Mizoram CEO Madhup Vyas hian kar hmasa khan Saitual District tlawhin Assembly inthlanpui neih tur atana an inbuatsaihna a lo enpui tawh bawk a, Saitual District hian kumin hi District a nih anga MLA inthlanpui a hmachhawn vawikhatna tur a ni a. MLA Constituency pathum – Chalfilh, Tawi leh Lengteng a awm a ni.