Mizoram Assembly hnuaia thawktu lak chungchang Mizoram-a zirlai pawl pahnih ten an buaipui mek

Tunhnaia Assembly Secretariat-a hna lak chungchangah induhsakna leh thil dik lo hmanga hna lak a awm nia sawi chu MSU chuan chhui chiang turin Deputy Chief Minister hnenah an ngen a. MZP pawhin he thil hi an chhui mek tih an sawi bawk.

Mizo Students’ Union (MSU) General Hqrs. hruaitute hian nimin khan Deputy Chief Minister Tawnluia chu a Pisa-ah hmuin tunhnaia Assembly Secretariat-a hna lak chungchangah Mizo thalai hna zawng mekte rilru tihnual thei thil dik lo a thleng nia lang chungchang hi an sawipui a, Assembly Secretariat-a hna lak chungchangah induhsakna leh thil dik lo hmanga hna lak nia thuthang chungchang hi chhui chiang tur leh Mizo thalaite rilru tihnual thei thil a awm a nih chuan a titute dân anga hrem ngei turin Deputy Chief Minister chu an ngen a. He hna lak chungchanga thil dik tawk lo thleng nia sawi chungchangah hian Mizo Zirlaite lungawi hma chu a tâwp thlengin an chhui dawn thu leh, RTI hmangin zawhna thehluh niin an hmalakna te thlawp tlat turin Mizo mipui leh zirlaite an sawm nghal bawk a ni.

Mizo Zirlai Pawl (MZP) pawhin nimin khan thuchhuah siamin tunhnaia Mizoram Assembly hnuaia thawktu lak chungchangah duhsak bik avanga thawktute vua leh vang lak an awm tih thawm awm chu an hriatin hma la in an chhui mek tih an sawi a, RTI hmangin document hrang hrangte dil mek a nih thu leh thil dik lo leh fel lo a awm a nih chuan Mizo thalaite’n an dikna chanvo an hmuh ngei theih nan hma an la dawn tih an sawi a ni. MZP President Lalnunmawia Pautu hemi chungchangah hian nimin khan Assembly Speaker an hmuh thu leh Speaker chuan, tunhnaia hna lak chu 'fair' taka kalpui a nih thu leh zawhna siamtute pawh pawnlam mi leh a chhunga thawktute siam niin, a tling leh thiam te ngei lak an nih theih nan dik taka kalpui a nih thu a sawi tih a sawi bawk.

MZP chuan National Institute of Technology (NIT), Mizoram thawktu lak chungchang ah thil fel lo awm nia a hriat avangin ngun taka an chhui thu pawh sawiin, NIT hnalak kalphung ah NIT awmna State mi leh sa, tling leh tlak duhsak tura tarlan a nih ang zawm lova, ram neitute nekchep zawng leh hlamchhiah zawnga hmalakna a awm ngei tih hriat a nih avangin hma an la tih an sawi a. Hemi chungchangah hian NIT Mizoram Director chu a Office-ah hmuin NIT kalphung anga hna ruak hnawhkhat tura an hrilh thu leh NIT Mizoram thuneitute chuan Mizo thalai tling leh tlak an lak tak thu an sawi a. MZP hmalakna anga NIT Mizoram-ah hnaruak hnawhkhah a ni chu lawmawm an tih thu leh hun kal zel turah NIT kalphung anga hna diltute en hrang lova dik taka la thin turin NIT Mizoram thuneitute chu an ngen thu an sawi bawk a ni.

Comments

Popular News (Last 30 Days)

LPG man bithliah thar