International Plastic Bag Free Day hmangin Ban on Single Use Plastic Drive hawnna neih a ni

International Plastic Bag Free Day chu nimin khan Mizoram-ah hman niin hemi rual hian hmankhat daih plastic hmang tawh lo tura inzirtirna beihpui ‘Ban on Single Use Plastic Drive’ hawnna neih nghal a ni.

Urban Development & Poverty Alleviation (UD&PA) Department leh State Mission Directorate, Swachh Bharat 2.0 te buatsaiha hemi puala MINECO Junction-a hun hman hi Deputy Chief Minister Tawnluia chuan hmanpuiin Mihring ten nitin-a bawlhhlawh an tihchhuah senghawi, a paihna hmun bik a paih, sawngbawl, hman nawn theih leh leitha a siam theih te thliarfel chu Central leh Mizoram State Pollution Control Board te nen thawkdunin hma nasa taka an lak tawh thu a tarlang a. District tinah Solid Waste Management Center din vek tum a nih thu sawiin, AMRUT 2.0 hnuaiah pawh faina kawnga hmasawnna thlen tum a ni, a ti.

‘Hman khat daih sarang’ titawp turin kum 2021 atangin sawrkar in hma a lak tawh thu Deputy Chief Minister chuan sawiin, State Level-ah Committee din niin, District tinah Deputy Commissioner (DC) te kaih-hruaina leh Aizawl District bikah Joint Municipal Commissioner kaihhruaina hnuaiah Ccommittee din a nih thu a sawi a. Heng Committee-te hnuaiah hian ‘Hman khat daih Sarang’ titawp turin Inspection Team din a nih thu leh bazar leh dawr hmun te an fan thin thu a sawi bawk.

He hunah hian khual zahawm Chief Secretary Dr. Renu Sharma pawhin ‘Hman khat daih sarang’ khapna thupek chu November ni 5, 2021 atanga kalpui a nih tawh thu a sawi a. Central Pollution Control Board-in kaihhruaina a siam zulzuiin Mizoram UD&PA Department chuan hmankhat daih sarang titawp turin ‘Action Plan’ a siam thu leh Mizoram sawrkar thiltih reng rengah hman ‘Hmankhat daih sarang’ hman loh hram tum a nih thin thu te, sawrkar pisa tam takin ‘Hman khat daih sarang’ hmang lo tura an intiam tawh thu te a sawi bawk a ni.

He hunah hian Mizoram Pollution Control Board Member-Secretary C. Lalduhawma chuan India rama ‘Hmankhat daih sarang’ titawp tura hmalakna hrang hrang te sawiin, sarang tawih thei lo te hian khawvel a tihbuai avangin titawp tura thapui thawh a ngai takzet tih a sawi a. He hunah hian tunhnaia ‘Cleanliness Trekking Expedition’ neia Lailapur atanga Khaikhy (Siaha District) thleng ke-a km 623 zet kal Vanlallawmzuala Varte chawimawina hun hman a ni bawk.

International Plastic Bag Free Day puala inkhawm neih hi UD&PA Secretary Lalmalsawma Pachuau chuan kaihruaiin inlawmna thu a sawi a. UD&PA Joint Director Malsawmzuala hovin ‘Hman khat daih sarang’ hmang lo tura intiamna hun hman a ni bawk.