Manipur atanga Mizoram-a raltlan zingah zirlai 1500 chuang an awm tawh

Manipur tualchhung buaina avanga Mizorama sahimna zawnga rawn lut zingah zirlai an awm belh zel a, tun dinhmunah Mizoram-a District hrang hrangah zirlai 1500 chuang an awm tawh.

School Education Department Director Lalsangliana sawi danin report hnuhnung berah zirlai 1500 vel School hrang hrangah admit an ni a, a hnuah Mizoram chhunga School zawm an awm belh neuh neuh avangin zirlai 1500 aia tam an awm a, Private School-a lut an awm bawk. Education Director Lalsangliana chuan Manipur mi leh sa Mizoram chhunga admit te hi sawrkar School-ah chuan a thlawn veka kaltir an ni tih sawiin, lehkha pawimawh mumal tak nei thei lo te pawh an dinhmun a harsat em avangin admit an ni tho a, Mid-Day Meal te pawh an dawng, a ti.

Manipur atanga Mizorama sahimna zawnga lo lut hi mi 12,000 vel an awm mek a. Sawrkar mai bakah tlawmngai pawl hrang hrang ten tanpuiin Central YMA-in Transit Camp a siamah mi 500 chuang an lut tawh a, heng mite hi a remchan dan angin Veng hrang hrangah sem darh leh thin an ni. Transit Camp enkawltute chuan raltlan lut zinga thenkhat chu phai lama lehkha zir chhunzawm turin an kal niin an sawi a, hei bakah hian Manipur sawrkarin pawl 9 chin chung lam School luh tur tia hriattirna a chhuah avangin haw chho an awm nual tih an sawi bawk.

Mizoram-a Manipur raltlante hi Central YMA chuan an remchan dan angin an hnathawh tur an zawnsak thin a, thenkhat chu mi awmpuiah tangin mi huan enkawltu leh ni tin inhlawhnate an zawn sak bawk a ni.