Latest News

Zawlpui Zau-a kawlphetha pek hna thawh mek tun thla chhunga zawhfel hman beisei a ni

Power & Electricity Department Serchhip ten Serchhip Mat Phai-a kuthnathawktu tam zawk ten an chhawr theih tura kawlphetha pek hna an kalpui mek chu harsatna dang a awm loh chuan tun thla chhung hian a thawh khatna zawh hman an inbeisei thu an sawi.
Serchhip Mat Phai ah hian hun engemaw chen kalta ah khan Kawlphetha pekna tur hi thlunluh a lo ni tawh a, hetah hian Electric Transformer pakhat, 25kVA dah niin chhawrtu erawh an tam lutuk thei lo a. Tunah hian mipui tam zawk ten kawlphetha an hmuha an chhawr theihna tur hian NABARD sum hmangin sawrkar chuan hma a la mek a, a thawh khatna atan Zawlpui, Lumtui leh Tuichar Zau-ah hmalakna kalpui mek a ni. He an hnathawh mek hi nimin khan LENKAWL chuan a hmunah tlawhin P&E Department-a thawktute chuan an hnathawh dan tlangpui an lo hrilh a, he hmalakna hnuaiah hian Zawlpui, Chawm, Tuichar, Lumtui, Zuangleng leh Lungbu zau-ah te kawlphetha pek tum a nih thu sawiin, tunah hian a thawh khatna atan Zawlpui, Tuichar leh Lumtui zau-ah hmalakna kalpui mek a ni tih an sawi a. Zawlpui zau-ah hian 25kVA Electric Transformer pathum, Tuichar zau-ah pahnih leh Lumtui zau-ah pakhat dah tura hmalakna kalpui mek a nih thu leh Zawlpui-a pathum te hi an peihfel tawh thu an sawi a, tunah hian Tuichar zau-a pahnih te hi buaipui mek a nih thu leh hemi hnu hian Lumtui zau-ah hmalak chhunzawm a nih dawn thu an sawi a ni.


P&E Department-a thawktute hian kawlphetha hi tunhma lama an lo lak tawhna atanga pawh belh a nih thu sawiin, Zawlpui zau-a an peihfel tawh atang hian Electric Connection pek theih a nih tawh thu leh mi thenkhat chuan an Thlam-ah Electric Wiring pawh an tihfel tawh thu sawiin, In lama Electric Connection ang bawka Test Report te pawh neih a tul dawn thu an sawi a. Connection la thei apiangte chu an pek nghal theih dawn thu sawiin, tuna an hrui thlun hmang hian 3 Phase Connection pawh pek theih a nih dawn avangin kuthnathawktute tan pawh a tangkai thei hle turah an ngai tih an sawi a. Tuna an hmalakna hnuaiah hian LT Line thlunna atan ban 50 phun tura ruahman ah engemaw zat an phun tawh thu pawh sawiin, a tira an ruahman ah LT Line hi KM 2 leh tlem pawt tura tih ni mah se an ruahman lawk aia thui an pawt tawh tih an sawi a ni.


Tuna hma an lakna mek bakah hian Chawm Kai lamah 12kVA Transformer hi pathum leh Zuangleng leh Lungbu zau-ah pakhat ve ve bun tura la ruahman a nih thu P&E Department hotute chuan sawiin, a vaiin Electric Transformer hi 11 bun tur a nih thu an sawi a. Tuna an hmalak mekna ah harsatna liantham an tawk lo tih sawiin, thla hnih chuang vel hna an thawh tawh thu leh harsatna dang in a tlakbuak a nih loh chuan tun thla chhung hian tuna an hmalakna chin chu zawhfel theih an beisei thu an sawi a ni.

Comments

Popular News (Last 30 Days)