NH. 54 Serchhip by-pass road leh Lei dawh mek kumin chhungin zawhfel hman beisei a ni

National Highway-54 in Serchhip khawpui a helna tura Sailiamkawn bul-a Lei dawh hna thawktute chuan Lei dawh hna thawh mek hi by-Pass road siam mek nen kumin chhunga zawh hman an tum thu an sawi a. He Lei dawh mek hi lirnghing lakah pawh him tura ngaih a nih thu an sawi.

National Highway-54 Serchhip by-pass Road-a Sailiamkawn bula Darnam lui chunga Lei dawh hna thawh mek hi nimin khan LENKAWL chuan a hmunah tlawhin he Lei dawh hna thawktu KRAM Infracon Pvt. Ltd. a thawktute nen an hnathawh mek dinhmun an sawiho a. He Lei dawh hna thawktute chuan helai hmuna Lei dawh tur hian December 2020 khan hna an thawh tan thu sawiin, an hnathawhna kawngah hian tun thlengin harsatna liantham an tawk lo tih aan ssawi a. Chutihrual erawh chuan Fur ruahtui tlak lai chuan hna thawh theih a nih loh thu sawiin, hei hi an harsatna tawh ber a nih thu an sawi a. Harsatna dang a awm a nih loh chuan he Lei dawh hna hi kumin chhunga zawh hman an tum thu leh NH. 54 kawngpui in Serchhip a helna tur kawngpui nen zawhrual an beisei thu an sawi a. He Lei dawh hna leh Serchhip helna kawng laih leh siam mek te hi hna pakhat hnuaia thawh a nih thu an sawi bawk.


He Lei dawh hna thawktute chuan tun dinhmunah hna thawh tur za zela 60-65 vel an zawh tawh thu sawiin, Lei hi RCC-a dawh tur a nih thu leh a hnuailam atanga chunglam-a kul chho, Arch bridge design a nih thu an sawi a. Tunah hian Lei hnuailam kul tur chu an zawh tawh thu leh Chhim lama Lei in nghahna tur pawh zo tawhin, Hmar lama Lei innghahna tur chu siam zawh ala nih loh thu leh hei pawh hi an zawh tep tawh thu an sawi a. Hmar lama Lei innghahna tur hi siam zawhfel anih hnuah chuan ‘Super Structure’ an tih mai, Lirthei in an zawh tur ber chu khawih tan anih dawn thu an sawi a. Lei chhah zawng hi Meter 1.2-a nih dawn thu leh a chhuat hi ban 12 in a do dawn thu an sawi a ni.

Lei dawh hna thawktute chuan Arch Bridge Design chu Mizoram ang tlangram tan chuan Lei design dan him ber a nih thu sawiin, Mizoram chu lirnghing natna hmuna a awm an nih angin lir-nghing lakah pawh him tura design a ni tih an sawi a. He lei hi meter 170-a thui tur niin meter 10-a zau tur a ni a, a sir tawn tawn ah meter 1.5 a zau mihring kalna tur nena belhkhawmin meter 13 a zau a ni ang.

He Lei dawh mek hi Serchhip Sub-Hqrs. Vigilance & Monitoring Committee pawhin nimin tlai khan tlawhin an thil hmuh dan District Bawrh-sap hnena an thlen tur thu an sawi a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man