PTS Thenzawl-a Training zo te thlahna hun hman a ni
Nimin-a Police Training zo thlah tak te hi 68th Batch Recruit Constable Basic Training zo mipa 3 leh hmeichhia 2, an vaiin mi 5 bakah 14th Batch Platoon Commander Course training zo mipa vek 62 te an ni a, heng mite hi PTS Principal HL. Thangzuala chuan rinawmna thu tiam tirin Inspr. H. Liansiama chuan report a pe bawk a. Constable Basic Training hi chawlhkar 40 chhung neih niin Platoon Commander Course Training hi chawlhkar 12 chhung neih a ni bawk.
Nimin-a Passing Out Parade hmanpuitu IGP Lalbiakthanga Khiangte chuan Police training zo te chu theihtawp chhuaha ram tana thawk tura chahin, mipui rawngbawltu an nih hre renga inti lal lo tur an ni lo tih hria a engtik lai pawha mipui tana biak nuam, tanpui ngaite tanpui tura inpe Police an nihna hrereng turin a chah a. Platoon Commander ten Police ah dinhmun pawimawh tak an chelh tih pawh sawiin, Platoon Commander tha in Battalion a tha zawngin an her danglam thei tih hriaa thahnem ngai taka tanla a Mizoram Police Armed Battalion hmel thar siamtu nih tum turin a fuih bawk.
IPC (L&O) chuan Mizoram chu midang ta a ni lo tih sawiin, keimahni ta a ni tih hriaa, Mizoram Police tha zawk, Zoram tha zawk, chenna nuam, mipui tan himna leh hlimna thlentu nih tum turin Police te a chah a. Tun tum Training-na a tithate hnenah lawmman a hlan nghal bawk.
Platoon Commander Course Training-ah hian titha ber lawmman chu Best in Outdoor-ah Hav. Eric VL. Romawia, 2nd IR Battalion chuan dawngin Best in Indoor-ah Hav. K. Laldawngkima, 1st IR Battalion chuan a dawng bawk. PTS Thenzawl-ah hian Police Constable training lai mi 279 an awm mek a ni.
Comments
Post a Comment