Tuikum bialtu MLA in Chhiahtlang North-ah Health Clinic Centre thar a hawng

Tuikum Bialtu MLA leh Minister Er. Lalrinawma chuan nimin khan Chhiahtlang North-ah Health Clinic Centre hawngin a bial chhunga Health Clinic Centre te chu la tih changtlun zel tur a nih thu a sawi.
Chhiahtlang North VC Hall-a Health Clinic Centre hawnna puala inkhawm neih ah Er. Lalrinawma chuan Chhiahtlang North a Health Clinic Centre hawn a ni chu lawmawm a tih thu sawiin, a bial chhung a enkawlna ah eizawnna, zirna leh hriselna chu a rilru kaptu lian leh a ngaih pawimawh hmasak an nih thu a sawi a. A bial chhunga Sub-Centre te chu Health and Wellness Centre-ah hlankai vek tawh a nih thu leh HWO in an thutchilh tawh thu sawiin, PHC-a Doctor insawn te pawh anmahni thlaktu dah anih tak zel thu a sawi a. A bial chhunga Health and Wellness Centre awmlohna ah te Health Clinic Centre 8 hawn a nih tawh thu leh heng te hi mipuite pawhin an thawhpui thain tangkai taka hman a nih tawh thu a sawi a. Heng hmun te hi nau nei tur leh mamawh dangte tan pawh pan tlak zel tura la tih phuisui zel tur a nih thu a sawi bawk.


Chhiahtlang North Health Clinic Centre hawnna hun hi Chhiahtlang North VCP C. Lalrawna chuan kaihhruaiin Serchhip-a Health Department atangin Serchhip District Immunization Officer (DIO) leh SMO Dr. Lallawmkimi Chhakchhuak chuan Health Clinic Centre chu Sub-Centre ang a ni lo tih a sawi a, amaherawh chu Sub-Centre in mipuite tana hna a thawh ang hrang hrangte chu a thawh theih thu a sawi a, sawrkar-a report an pek thin leh hnathawhna atana an mamawh ang te chu Sub-Centre kaltlanga dawng ve tur an nih thu a sawi bawk.

He hunah hi hian Chhiahtlang North VC Treasurer HV. Hrangchhuana chuan report pe in he Health Clinic Centre hawng tura hma an lakna te a sawi a. NH. 54 laihzauh hna thawh a nih dawn khan Chhiahtlang Bazar Building chu tihchhiat a tul avangin zangnadawmna an hmuh chu Chhiahtlang a VC pahnih ten cheng nuai 40 vel ve ve a insemin hemi atang hian cheng nuai 20 in Presbyterian Chhiahtlang Bial Centenary Building hlui chu an lei thu leh a bak cheng nuai 20 hmangin building hi sak a nih thu a sawi a. Kawngpui an-ah Bazar Shed bakah Health Clinic Centre tur hi ruahman in a chung chu VC Hall atan hman phawt a nih thu leh mipuiin an mamawh dan a zirin a chung pawh hi la hman zui zel tur a nih thu a sawi bawk.


Chhiahtlang North Health Clinic Centre-ah hian Health Worker Vansangkimi awmin Helper pakhat bakah an hnuaiah hian ASHA mi 3 an awm dawn bawk a. Bialtu MLA hian an mamawh hmasa leina atan Rs. 10,000/- a lo pe tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar