Sports Minister in hmalakna hrang hrang a tlawh

Sports Minister Robert Romawia Royte chuan Mamit District chhunga infiamna ruhrel siam mek te nimin khan a hmunah kalin a enfiah. Sports Minister hian cheng nuai 4400 senna tur Mamit District Sports Complex, cheng nuai 3286 senna tur Mamit Residential Sports School, cheng nuai 1200 senna tur Mamit Mulitipurpose Indoor Stadium sak mek te chu a hmunah tlawhin a enfiah a. Darlak Football Field-a tuilian danna siam leh Basketball Court sak mek pawh khawtlang hruaitute nên enin hmalak zel dan tur pawh an sawi ho nghal a ni. Kawrthah a Volleyball Court siam mek leh Lighting System te enin Kawrthah Residential School Building hrang hrang te leh a ken tel Sports Infrastructure te a en a, Rengdil-a Basketball Court leh Volleyball Court te a hranga sa lo-a Semi Indoor Stadium-a Integrated Centre anga sak an duh thu an lo thlen pawh tihpuitlin tum a nih thu a sawi a. Hachhek Bial-a Kuhva chingtu ten Kuhva ro tawlh rûk check-na tura Zamuang-a Check Gate an siam pawh a tlawh bawk.